ދިއްދޫ ހައުސިން ޔުނިޓް މަޝްރޫއަކީ ޑިޒައިން އެންޑް ބިލްޑް އުސޫލުން 2022 ވަނަ އަހަރުގެ އޮގަސްޓު މަހުގެ ތެރޭގައި އެސްޖޭ ކޮންސްޓްރަކްޝަންއާ ހަވާލުކުރި މަޝްރޫއެކެވެ. އެގޮތުން ދިއްދޫގައި 75 ހައުސިން ޔުނިޓު އަޅަން އެސްޖޭ ކޮންސްޓްރަކްޝަންއާ ހަވާލުކޮށްފައިވަނީ 120 މިލިއަން ރުފިޔާގެ އަގަކަށް ކަަމަށް ހައުސިން މިނިސްޓްރީން ބުނެއެވެ.
އެ މަޝްރޫއުގެ ދަށުން އިމާރާތްކުރާ 75 ހައުސިންޔުނިޓުގެ މަސައްކަތުގެ ތެރެއިން ހުރިހާ ހައުސިންޔުނިޓެއްގެ ރާނާ ސިމެންތިޖަހައި ހިޔާކުރުމުގެ މަސައްކަތްތައް ނިމިފައިވާއިރު، ސީލިންގު ކުރުމުގެ 24 އިންސައްތަ މަސައްކަތް މިހާތަނަށް ނިންމާފައިވާކަމަށް ހައުސިން މިނިސްޓްރީން ބުނެއެވެ.
އޭގެއިތުރުން ޕުޓީ ލުމާއި ކުލަލުމުގެ 12 އިންސައްތަ، ދޮރު ހަރުކުރުމުގެ 13 އިންސައްތަ މަސައްކަތް ވަނީ ނިންމައިފައެވެ. އަދި އެ ހައުސިން ޔުނިޓުތަކުގެ ކަރަންޓު ވައިރިންކުރުމުގެ 36 އިންސައްތަ ނިމިފައިވާއިރު ފެންވައިރު ކުރުމުގެ 24 އިންސައްތަ މަސައްކަތް ނިންމާލާފައިވާކަމަށް ހައުސިން މިނިސްޓްރީން ބުނެއެވެ.
އެ މަޝްރޫއުގެ ދަށުން އިމާރާތްކުރާނީ ދެ ފަންގިފިލާގެ ރޯހައުސްތަކެކެވެ. އެ ކޮންމެ ރޯހައުސްއެއްގައި ތިން ކޮޓަރި، ތިން ފާހަނަ، ސިޓިން ރޫމް، ބަދިގެ، ކާގެ، ލޯންޑްރީ އަދި ސްޓޯރޫމް ހުންނާނެއެވެ.
ދިއްދޫގައި އިމާރާތްކުރާ ހައުސިން ޔުނިޓުތަކުގައި ދިރިއުޅޭ ރައްޔިތުންގެ ފަސޭހައަށާއި ހިތްހަމަޖެހުމަށް އެ ސަރަހައްދު ވަށައިގެން އަލިކޮށް އެ ސަރަހައްދުގައި ޕާކަކާއި ވެހިކަލް ޕާކިން ޒޯނެއް ގާއިމްކުރާނެ ކަމަށް ހައުސިން މިނިސްޓްރީން ބުނެއެވެ.
