ފުޓްބޯޅަ ކުޅުން ހުއްޓާލަން ނިންމިއިރު، އިނިއެސްޓާގެ އުމުރަކީ 40 އަހަރެވެ. ރިޕޯޓްތައް ބުނާ ގޮތުން އަންނަ ހަފްތާގައި ރަސްމީކޮށް އޭނާ ކުޅުން ހުއްޓާލާނެއެވެ.
ކެރިއަރުގެ ބޮޑު ބައެއް ބާސެލޯނާގައި ހޭދަކުރި ލެޖެންޑް، މި ފަހުން އުޅުނީ އާދައިގެ ލީގުތަކުގައެވެ. މިދިޔަ ސީޒަނުގައި އިނިއެސްޓާ ކުޅުނީ ދުބާއީގެ އެމިރޭޓްސް ކްލަބަށެވެ. އިނިއެސްޓާ، ރިޓަޔާކުރާނީ، ބާސެލޯނާގެ ސީނިއާ ޓީމަށް 2002 ވަނަ އަހަރު ފުރަތަމަ ސީޒަން ކުޅުނު ފަހުން، ފުޓްބޯޅައިގެ އެންމެ މަތީ ފަންތީގައި 23 ސީޒަން ހޭދަކުރުމަށް ފަހު އެވެ.
ބާސެލޯނާގެ ސީނިއާ ޓީމަށް 16 އަހަރު ކުޅުނު އިނިއެސްޓާ 2018 ވަނަ އަހަރު ބަދަލުވީ، ޖަޕާނުގެ ޖޭ ލީގުގެ ކްލަބް، ވިސެލް ކޯބޭ އަށެވެ. ފަސް އަހަރު އެ ޓީމަށް ކުޅުމަށް ފަހު، މިދިޔަ އަހަރު ގުޅުނީ އެމިރޭޓްސް ކްލަބްއާ އެވެ.
އިނިއެސްޓާއަކީ ސްޕެއިނުން 2010 ވަނަ އަހަރު ފީފާ ވޯލްޑް ކަޕް ޗެމްޕިއަންކަން ހޯދި ގޯލު ޖެހި ކުޅުންތެރިޔާއެވެ. އިނިއެސްޓާ ވަނީ ސްޕެއިން ޓީމާ އެކު، 2008 ވަނަ އަހަރާއި 2012 ވަނަ އަހަރުގެ ޔޫރޯ ވެސް ކާމިޔާބުކޮށްފަ އެވެ. ގައުމީ ޓީމަށް، 131 މެޗު ކުޅެދިން އިނިއެސްޓާ އަކީ ސްޕެއިނަށް ހަތަރު ވަނަ އަށް އެންމެ ގިނަ މެޗު ކުޅެދިން ކުޅުންތެރިޔާ އެވެ.
