ޖަލުގައި ތިބޭ ކުށްވެރިންނަށް މަސްތުވާތަކެއްޗާއި ފޯނު ފަދަ ތަކެތި، ރިޝްވަތު ނައިގެން ފޯރުކޮށް ދެމުން ދިޔަ މައްސަލައިގައި ހައްޔަރުކުރި މޯލްޑިވްސް ކަރެކްޝަނަލް ސާވިސަސްގެ 13 އޮފިސަރުންގެ ތެރެއިން 11 އޮފިސަރަކު ޝަރީއަތް ނިމެންދަން ބަންދު ކުރަން ކޯޓުން ވަނީ އަމުރުކޮށްފައެވެ. އޭގެ ތެރެއިން ދޫކޮށްލާފައިވާ އެކަކީ ކ. މާފުށީ މާވިނަ ޒަޔާން އަހްމަދެވެ. ޒަޔާން ހައްޔަރުކޮށްފައިވަނީ ޖޫން މަހު ޖަލުގެ އާމަރީ ކައިރިންނެވެ. އޭނާ ހުރީ ޝަރީއަތް ނިމެންދެން ބަންދުކޮށްފައެވެ.
ފުލުހުން ބުނީ މި މައްސަލާގައި ކަރެކްޝަނަލް ސާވިސްގެ 13 އޮފިސަރެއްގެ މައްޗަށް ދައުވާކުރަން ފޮނުވާފައިވާކަމަށެވެ. މި ހުރިހާ އޮފިސަރުން ހައްޔަރުކުރުމަށްފަހު، އެ މީހުން ދިރިއުޅެމުންދިޔަ ތަންތަން ފުލުހުން ވަނީ ބަލާ ފާސްކޮށްފައެވެ. އެކަމަކު މި އެންމެންގެ މައްޗަކަށް ދައުވާއެއް ނުކުރެއެވެ. ދައުވާ ކުރަނީ އެނގިފައިވާ ގޮތުގައި ފަސް މީހެއްގެ މައްޗަށެވެ.
މި މައްސަލައިގައި 18 ކަރެކްޝަންސް އޮފިސަރުން ހިމެނޭ ކަމަށާއި އެ އޮފިސަރުންގެ އެކައުންޓަށް މިދިޔަ އަހަރު އެކަނި ވެސް 73.3 މިލިއަން ރުފިޔާ ޖަމާކޮށްފައިވާ ކަމަށް ހޯމް މިނިސްޓަރު އަލީ އިހުސާން ވަނީ ވިދާޅުވެފައެވެ. އެއް އޮފިސަރެއްގެ އެކައުންޓަށް އަހަރެއް ތެރޭގައި 24 މިލިއަން ރުފިޔާ ޖަމާކޮށްފައިވާއިރު، އެ ފައިސާ ޖަމާކޮށްފައި ވަނީ ކުދި އަދަދުތަކުން ކަމަށް ވެސް އިހްސާން ވަނީ ވިދާޅުވެފައެވެ.
