އެޗްޑީސީން މީގެކުރިންވެސް ވަނީ ހުޅުމާލޭ ދެވަނަ ފިޔަވަހީގެ ޗެނަލް ޕްރޮޖެކްޓް 02 ފެށުމަށް ހަމަޖެހިފައިވާ ސަރަހައްދާއި ދެވަނަ އަދި ތިންވަނަ ފިޔަވަހީގެ ހުސް ބިންތަކުގައި ގަވައިދާ ހިލާފަށް ބަހައްޓާފައިވާ ތަކެތި ނެގުމަށް އަންގާފައެވެ.
އެޗްޑީސީން ބުނީ ގަވައިދާ ހިލާފަށް ބަހައްޓާފައިވާ ތަކެތި ނެގުމަށް އިއުލާންކުރި ނަމަވެސް ގިނަ ފަރާތްތަކުން އެކަމަށް އިޖާބަދީފައި ނުވާކަމަށެވެ. އަދި ހުޅުމާލޭ ތިންވަނަ ފިޔަވަހީގެ ހުސް ބިންތަކުގައި ގަވައިދާ ހިލާފަށް މުދަލާއި ތަކެތި ބަހައްޓައި، ބައެއް ފަރާތްތަކުން އަދިވެސް އެ ބިންތައް ބޭނުންކުރަމުން އަންނަކަމަށް އެޗްޑިސީން ބުނެއެވެ.
އެޗްޑިސީން ވަނީ ގަވައިދާ ހިލާފަށް ބަހައްޓާފައިވާ ތަކެތި މިމަހުގެ 11ގެ ކުރިން ނެގުމަށް އެދިފައެވެ. އަދި މި މުއްދަތުގައި ތަކެތި ނުނަގައިފިނަމަ އޮންނަ އުސޫލުން އަމަލުކުރާނެކަމަށް އެޗްޑީސީން ބުނެއެވެ.
ދިން މުއްދަތުގެ ތެރޭގައި ނުނަގާ ހުންނަތަކެތި އެކޯޕަރޭޝަނުން ނެގުމުގެ މަސައްކަތް ކުރުމުގެ ތެރޭގައި އެ މުދަލަށް ނުވަތަ ތަކެއްޗަށް ލިބިދާނެ ގެއްލުމަކަށް ޒިންމާ ނުވާނެ ކަމަށް ވެސް އެޗްޑީސީން ބުނެއެވެ.
