އެ ކޮމިޝަނުން ބުނީ މި ނިންމުމަށް މާދަމާއިން ފެށިގެން އަމަލުކުރަން ފަށާނެކަމަށެވެ.
އެހެންކަމުން އިލެކްޝަންސް ކޮމިޝަނުން ބަލަހައްޓާ ސިޔާސީ ޕާޓީތަކުގެ މެންބަރުންގެ ދަފްތަރުން ވަކިވުމަށް އެދި ހުށަހަޅާނީ، ކޮމިޝަނުގެ އޮންލައިން ޕޯޓަލް (my.elections.gov.mv) މެދުވެރިކޮށްކަމަށް އީސީން ބުނެއެވެ.
މީގެ ކުރިން ސިޔާސީ ޕާޓީއަކުން ވަކިވާން ބޭނުންނަމަ ޖެހޭނީ އެޕާޓީއަކަށް ސިޓީއަކުން ހުށައެޅުމާއި އެކު އެކަމަށް ހާއްސަކޮށްފައިވާ ފޯމަކު އިލެކްޝަން ކޮމިޝަނަށް ހުށައަޅާށެވެ.
އިލެކްޝަންސް ކޮމިޝަނުން ވަނީ ދާދިފަހުން ސިޔާސީ ޕާޓީތަކުގެ ގަވައިދަށް ބައެއް އިސްލާހުތައް ގެނެސްފައެވެ. އޭގެ ތެރޭގައި އެެއްވެސް މީހަކު ޕާޓީއަކުން ވަކިވުމަސް އެދިއްޖެނަމަ 14 ދުވަހުގެ ތެރޭގައި އެ މީހަކު ޕާޓީން ވަކިކޮށްދޭން ޖެހޭނެއެވެ. އަދި އެ މުއްދަތުގެ ތެރޭގައި އެކަން ނުކޮށްދީނަމަ ކޮމިޝަނުން ކަނޑައަޅާ ނިޒާމުގެ ތެރެއިން ޝަކުވާ ހުށަހެޅުމުން އޭނާގެ ނަން، ޕާޓީގެ ދަފްތަރުން އުނިކޮށްދޭންޖެހޭކަމަށް ގަވައިދުގައި ވަނީ ހިމަނާފައެވެ.
މީގެއިތުރުން އެ މީހަކު ކުރިން ހުރި ޕާޓީއަށް ނޭނގި އެހެން ޕާޓީއަކަށް ވައްދާފައިވާނަމަ ކުރީގައި ހުރި ޕާޓީއަށް ބަދަލުވުމަށް ކޮމިޝަނަށް ހުށަހެޅުމުން ނޭނގި ރަޖިސްޓްރީކޮށްފައި އޮތް ޕާޓީން އެމީހަކު ވަގުތުން ވަކިކޮށް، ކުރިން ހުރި ޕާޓީއަށް އަލުން ވެއްދުމަށްވެސް ގަވައިދުގައި ވަނީ ހިމަނާފައެވެ.
