ބިން ވިއްކަން ކުރި އިއުލާނާއެކު އެއްކަރުދާސްކޮށްފައިވާ މައުލޫމާތަށް ބަލާއިރު ވިއްކަނީ 3746 އަކަފޫޓުގެ އަށް ބިމަކާއި 3689 އަކަފޫޓުގެ ހަތަރު ބިމެކެވެ. ބީލަން ފެށޭ އަގަކީ އަކަފޫޓަކަށް 7500ރ. އެވެ.
ހަމައެކަނި ދިވެހިންނަށް ކުރިމަތިލެވޭ ގޮތަށް ވިއްކަން ހުޅުވާލާފައިވާ މި ބިންތަކަށް އުމުރުން 18 އަހަރުވެފައިވާ ކޮށްމެ ދިވެހި ރައްޔިތަކަށް ވެސް ބީލަން ހުށަހެޅެ އެވެ.
ބީލަން ހުށަހަޅަނީ ކުންފުންޏަކުންނަމަ އެ ކުންފުންޏަކީ ރާއްޖޭގައި ރަޖިސްޓްރީ ކޮށްފައިވާ 100 ޕަސަންޓް ދިވެހިންގެ ހިއްސާ އޮންނަ ކުންފުންޏެއް ކަމުގައި ވާންޖެހެ އެވެ.
އެޗްޑީސީން ބުނީ ބިން ވިއްކުން ކުރިއަށްދާނީ 2 މަރުހަލާއަކަށް ބަހާލައިގެން ކަމަށާއި ފުރަތަމަ މަރުހަލާގައި ކުރިއަށްދާނީ ޕޯޓަލް މެދުވެރިކޮށް ޝައުގުވެރިވާ ފަރާތްތަކުން ބިމަށް އެކްސްޕްރެޝަން އޮފް އިންޓްރަސްޓް (އީއޯއައި) ހުށަހެޅުންކަމަށެވެ.
އަދި ދެވަނަ މަރުހަލާގައި ކުރިއަށްދާނީ އެއް ފަރާތަށްވުރެ ގިނަ ފަރާތުން ހުށަހަޅާފައިވާ ބިމަކަށް ބިޑް ކުރުންކަމަށްވެސް އެޗްޑީސީން ބުންޏެވެ.
ބިންތަކުގެ ބީލަން ފެށޭ އަގަކީ އަކަފޫޓަކަށް 7،500 ރުފިޔާ އެވެ. ކޮންމެ ފަރާތަކަށްވެސް ޖުމްލަ 03 ބިން ގަނެވިދާނެ އެވެ.
ބިން ގަތުމަށް ބިޑު ހުށަހަޅަންޖެހޭނީ އެޗްޑީސީގެ އޮންލައިން ޕޯޓަލް މެދުވެރިކޮށެވެ. މިހާރު އެ ފުރުސަތު ވަނީ ހުޅުވާލައިފަ އެވެ. އެގޮތުން މިހާރު ވިއްކުމަށް ހުޅުވާލެވިފައިވާ ބިންތަކުގެ މައުލޫމާތު ބިޑް ޕޯޓަލް މެދުވެރިކޮށް ލިބޭނެ ކަމަށް އެޗްޑީސީން ބުނެ އެވެ.
