މިކަން ހާމަ ކުރީ އެ ކުންފުނީގެ 25 ވަނަ އަހަރީ ދުވަހުގެ މުނާސަބަތުގައި ބޭއްވި ޖަލްސާގައި އެވެ.
މި ޖަލްސާގައި ވާހަކަ ދައްކަވަމުން މޯލްޑިވް ގޭސްގެ މެނޭޖިން ޑިރެކްޓަރ އަބްދުﷲ މުހައްމަދު ވިދާޅުވީ އެއާ ކޮންޑިޝަނާ، އޭސީ މަރާމަތުކުރުމުގައި ބޭނުންކުރާ ގޭހުގެ ބާވަތް ބަލްކުކޮށް ރާއްޖެ އެތެރެކޮށް، ހެޔޮ އަގުގައި ވިއްކުމުގެ މަގު ފަހިކުރުމަށް މަސައްކަތް ކުރަމުންދާކަމަށެވެ.
އަދި ކައްކާ ގޭސް ހުސްނުވެ ލިބޭނެ އިންތިޒާމުވެސް ފުޅާކުރުމުގެ މަސައްކަތްކުރަމުން އަންނަކަމަށްވެސް އެމްޑީ ވިދާޅުވި އެވެ.
އޭނާ ވިދާޅުވީ މޯލްޑިވް ގޭހަށް މިވަގުތު އެންމެ ބޮޑު ދައްޗަކީ އޮފީސް ހިންގާނެ އެކަށީގެންވާ ޖާގަ ނެތުން ކަމަށެވެ. ނަމަވެސް ހުޅުމާލެ އިން ބިމެއް ހޯދައިގެން އެތަނުގައި 10 ބުރީގެ އިމާރާތެއް އަޅައި ކުރިއަށް އޮތް ދެތިން އަހަރެއްގެ ތެރޭގައި އެތަން ބޭނުންކުރަން މަސައްކަތް ކުރަމުންދާ ކަމަށްވެސް ވިދާޅުވި އެވެ.
އެސްޓީއޯގެ ސަބްސިޑަރީއެއް ކަމަށްވާ މޯލްޑިވް ގޭސް އުފެއްދީ 3 އޮކްޓޫބަރު 1999 ގައެވެ. އެންމެ ފުރަތަމަ އެ ކުންފުނިން ދޭން ފެށީ ކައްކާ ގޭހުގެ ހިދުމަތެވެ. ނަމަވެސް އޭގެ ފަހުން 25 އަހަރު ވޭތުވެ، ކުންފުނީގެ ހިދުމަތްތައް ވަނީ ވަރަށް ބޮޑަށް ފުޅާކޮށްފަ އެވެ.
