ރައީދް ޑރ. މުއިއްޒު މިހެން ވިދާޅުވީ މިއަދު އެމަނިކުފާނު އިންޑިއާއަށް ފެއްޓެވި ދަތުރުފުޅުގެ ކުރިން އިނގިރޭސިވިލާތުގެ "ބީބީސީ" އަށް ދެއްވި އީމެއިލް އިންޓަވިއުއެއްގައެވެ.
އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް ރައީސް ޑރ. މުއިއްޒު އެ ގައުމަށް ކުރައްވާ ރަސްމީ ދަތުރުފުޅުގައި މިއަދު ހެނދުނު ވަނީ ފުރާވަޑައިގެންފައެވެ.
ބީބިސީއަށް ރައީސް ދެއްވި އިންޓަވިއުގައި އެމަނިކުފާނު ވިދާޅުވީ ރާއްޖެއަށް ކުރިމަތިވެފައި އޮތް އިގްތިސާދީ ދަތިކަމުން އަރައިގަތުމަށް އިންޑިއާގެ އެހީ ލިބޭނެކަމުގެ ޔަގީންކަން އެބައޮތް ކަމަށެވެ. އެގޮތުން އިންޑިއާއަށް ރާއްޖޭގެ މާލީ ހާލަތު އޮތް ގޮތް ވަރަށް ރަނގަޅަށް އެނގޭ ކަމަށްވެސް ރައީސް ޑރ. މުއިއްޒު ވިދާޅުވިއެވެ.
ރާއްޖެއަށް ދިމާވެފައިވާ އިގްތިސާދީ ދަތިކަމުން އަރައިގަތުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް)ގެ އެހީގެ ޕްރޮގުރާމަކަށް ރާއްޖެ ނުދާނޭކަމަށްވެސް ރައީސް ޑރ، މުއިއްޒު ވިދާޅުވިއެވެ.
ދަރަނި ނުދެއްކޭ ހާލަތަށް ދިއުމުގެ ފުރުސަތު ބޮޑުކަމަށް ލަފާކޮށް ދުނިޔޭގެ އެންމެ ބޮޑު އެއް ކްރެޑިޓު ރޭޓިން އެޖެންސީ މޫޑީސްއިން ރާއްޖޭގެ ކްރެޑިޓު ރޭޓިން ސީއޭއޭ-2އަށް ދަށްކުރުމާއި ގުޅުވާ ބީބީސީން ކުރި ސުވާލަށް ޖަވޡާބު ދެއްވަމުން ރައީސް މުއިއްޒު ވިދާޅުވީ ރާއްޖެއިން ސޮވަރިން ޑީފޯލްޓަކަށް ނުދާނެ ކަމުގެ ޔަގީންކަން އެބައޮތްކަމަށެވެ. އެކަން ހައްލުކޮށް ދަރަނި މެނޭޖްކުރަން "ހޯމް-ގްރޯން އެޖެންޑާ" އޮތްކަމަށް ވިދާޅުވިއެވެ. އެގޮތުން ރައީސް އިޝާރަތްކުރެއްވީ އެތެރޭގެ ހަރަދުތައް ކުޑަކުރުމަށް ސަރުކާރުން އަޅުއްވަން ފަށާފައިވާ ފިޔަވަޅުތަކަށެވެ.
ބީބީސީން ބުނީ ރައީސް ޑރ. މުއިއްޒު މިއަދު އިންޑިއާއަށް ފެއްޓެވި ދަތުރުފުޅުގައި އެންމެ މުހިންމު ކަމަކަށް އެޖެންޑާގައި އޮތީ އިންޑިއާއިން މާލީ އެހީތެރިކަން ލިބޭތޯ މަސައްކަތް ކުރުންކަމަށެވެ.
ރައީސް މުއިއްޒުގެ އަރިހުގައި ވަޑައިގަތް، ދިވެހި ސަރުކާރުގެ މަތީ ފެންވަރުގެ ވަފުދުގައި ފޮރިން މިނިސްޓަރު ޑރ. އަބްދުﷲ ހަލީލް އާއި ޑިފެންސް މިނިސްޓަރު މުހައްމަދު ގައްސާން މައުމޫނާއި ހޯމް މިނިސްޓަރު އަލީ އިހްސާން އާއި ފިނޭންސް މިނިސްޓަރު މޫސާ ޒަމީރާއި ހެލްތު މިނިސްޓަރު އަބްދުﷲ ނާޒިމް އިބްރާހިމް އާއި އިކޮނޮމިކް މިނިސްޓަރު މުހައްމަދު ސައީދު ހިމެނިވަޑައިގަންނަވަ އެވެ.
މީގެ އިތުރުން، ޓޫރިޒަމް މިނިސްޓަރު އިބްރާހިމް ފައިސަލް އާއި ޓްރާންސްޕޯޓް މިނިސްޓަރު މުހައްމަދު އަމީނާއި އެޓާނީ ޖެނެރަލް އަހްމަދު އުޝާމް އާއި ކޮންސްޓްރަކްޝަން އެންޑް އިންފްރާ ސްޓްރަކްޗާ މިނިސްޓަރު ޑރ. އަބްދުﷲ މުއްތަލިބްގެ އިތުރުން ޗީފް އޮފް ސްޓާފް އަބްދުﷲ ފަޔާޒް އާއި ރައީސް އޮފީހުގެ ބައެއް އިސް ބޭފުޅުން ބައިވެރިވެވަޑައިގަތެވެ.
