މިފްކޯގެ ޑިރެކްޓަރުންގެ ބޯޑުގެ ޗެއާޕަސަން ކަމުގެ މަގާމުގައި ހުންނެވި ގދ.ތިނަދޫ އަށް ނިސްބަތްވާ އަމަހްދު ޝަރީފް މިއަދު މަގާމުން ވަކިކޮށްފައިވާކަމަށް ޕްރައިވެޓައިޒޭޝަން އެންޑް ކޯޕޮރަޓައިޒޭޝަން ބޯޑް (ޕީސީބީ) އިން ބުނެއެވެ.
އޭނާ އެ މަގާމުން ވަކިކޮށް ހަމަ މިއަދުގެ ވަގުތެއްގައި ވަނީ، މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަން (އެމްފޯމްޕީސީ) ގެ ޑިރެކްޓަރުންގެ ބޯޑުގެ ޗެއާޕާސަން ކަމުގެ މަގާމަށް އައްޔަނުކޮށްފައި ކަމަށް ޕީސީބީން މައުލޫމާތުދެއެވެ.
އެމްފޯމްޕީސީ އަކީ މަސްވެރިކަމުގެ ސިނާއަތުގެ ތަރައްގީއަށް ރާއްޖޭގައި ބާނާ މަސް، ބައިނަލްއަގްވާމީ ބާޒާރަށް ނެރުމަށް މާކެޓްކޮށް އިޝްތިހާރުކުރުމަށް ސަރުކާރުން އުފައްދާފައިވާ ހާއްސަ ކުންފުންޏެެކެވެ. އަދި އެއީ ސަރުކާރުގެ ސައްތައިން ސައްތަ ހިއްސާ އެކުލެވިގެންވާ ކުންފުންނެކެވެ.
ސަރުކާރުން މައުލޫމާތުދޭ ގޮތުގައި އެ ކުންފުނި އުފެއްދުމުގެ ބޭނުމަކީ ރާއްޖޭގެ މަސްވެރިކަމުގެ ސިނާއަތު އިތުރަށް ފުޅާކޮށް ރައްޔިތުންނަށް އޭގެން ލިބިދޭ މަންފާ އިތުރުކުރުމެވެ. އެގޮތުން އެކުއާކަލްޗާ އާއި މެރިކަލްޗާވެސް ހިމެނޭހެން ބައިނަލްއަގްވާމީ ބާޒާރުގައި އިޝްތިހާރުކޮށް ޕްރޮމޯޓްކުރުމުގެ މަސައްކަތް އެމްފޯމްޕީސީ އިން ކުރާނެ ކަމަށް ސަރުކާރުން ބުނެއެވެ.
