މިނިސްޓަރު މިހެން ވިދާޅުވީ ބުރާސްފަތި ދުވަހު ޕާކިން ބިލްޑިންގަތައް އެޅުމަށްޓަކައި ފަހުމުނާމާގައި ސޮއިކުރަމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރު އަމީން ވިދާޅުވި ގޮތުގައި ކުރީގެ ސަރުކާރުގައި، ވެހިކަލް ރަޖިސްޓްރީ އާއި ލައިސަންސް ދޫކުރުން ފަދަ ހިދުމަތްތަކުގައި އުސޫލާ ހިލާފަށް ފައިސާ ނަގައި، ބޮޑެތި ގޯސްތައް ހަދާފައިވާކަން ވަނީ ފަޅާއަރާފައެވެ.
ވެހިކަލް ރަޖިސްޓްރޭޝަން އަދި ލައިސަންސާ ގުޅުން ހުރި މަސައްކަތެއް ވިޔަސް މިނިސްޓްރީގެ ތެރޭގައި މިހާރު އުސޫލުން ބޭރުން ނުކުރާނެކަމަށް މިނިސްތަރު ވިދާޅުވިއެވެ. އަދި މި ކަންކަމަށް ބަދަލުތަކެއް ގެންނަ ނަމަ އާންމުންނަށް އެނގޭނެ ގޮތަށް ގެޒެޓުކުރާނެ ކަމަށްވެސް މިނިސްތަރު އަމީން ވިދާޅުވިއެވެ.
އޭގެ އިތުރުން، މާލެ ސަރަހައްދާއި އެހެނިހެން ހިސާބުތަކުގައި ވެސް ވެހިކަލް ރަޖިސްޓްރީކުރަން އެކުލަވާލާފައިވާ ގަވާއިދަކީ މި ދުވަސްވަރަށް ނުފެތޭ އެއްޗެއްކަން ފާހަގަކުރެއްވިއެވެ. އެހެންކަމުން، އެ ގަވާއިދަށް ބަދަލު ގެނައުމަށް ފަހު ކުރިއަށް އޮތް 10 ވަރަކަށް ދުވަހުގެ ތެރޭގައި އާންމުކުރާނެ ކަމަށް އަމީން ވިދާޅުވިއެވެ.
މި ބަދަލުތަކާއެކު، ޓްރާންސްޕޯޓް މިނިސްޓްރީގެ ހިދުމަތްތައް ހަރުދަނާވެ، އާންމު ރައްޔިތުންނަށް ލުއިފަސޭހަ ގޮތެއްގައި ހިދުމަތް ލިބިގެންދާނެ ކަމަށް މިނިސްޓަރު ވިދާޅުވިއެވެ.
