މި ހުށަހެޅުމުގައި ގައިދީންނާއި ބަންދުކުރާ މީހުންގެ ބޮލާއި މަތިމަސް އަދި ތުނބުޅި ކޮށުން ނުވަތަ ބޭލުން މަޖުބޫރުނުކޮށް، އެއީ ގައިދީންގެ އިހްތިޔާރީ ކަމެއްގެ ގޮތުގައި ހަމަޖެއްސުމަށް ވަނީ ބާރުއަޅާފައެވެ.
އެޗްއާރުސީއެމްއިން މިފަދަ ހުށަހެޅުމެއް ހުށަހެޅުމަށް ނިންމީ، އެ ކޮމިޝަނުން ތަޙުޤީޤުކުރި އެކި މައްސަލަތަކުގައި ފިރިހެން ގައިދީންގެ ބޯކޮށުމާ ގުޅޭ މައްސަލަތައް ގިނަވުމާ ގުޅިގެންނެވެ. މިކަމާ ގުޅިގެން އެ ކޮމިޝަނުން ވަނީ "ފިރިހެން ގައިދީންނާއި ޖަލުގައި ބަންދުކުރާ މީހުންގެ ބޯކޮށުމާ ގުޅޭ ޕޮލިސީ ރިވިއު" ކަރުދާހެއް އާންމުކޮށްފައެވެ.
މި ހުށަހެޅުމުގައި، ބޭރު ގައުމުތަކާއި ބައިނަލްއަގްވާމީ މިންގަނޑުތަކަށް ރިއާޔަތްކޮށް، ގަވާއިދުތަކަށް އިސްލާހު ގެނައުމަށް ވަނީ ހުށަހަޅާފައެވެ. މީގެ ތެރޭގައި، ބޯކޮށުމަކީ ސާފުތާހިރުކަމުގެ ބައެއް ކަމަށްވާތީ، އެކަން ސުލޫކީ މިންގަނޑުގެ ތެރެއިން އުނިކުރުމާއި، އިސްތަށިގަނޑާއި ތުނބުޅި/މަތިމަސް ކޮށަން އެދުމަކީ ގައިދީން އަމިއްލަ އިހްތިޔާރުގައި ކުރާ ކަމެއްގެ ގޮތުގައި ބަދަލުކުރުން ހިމެނެއެވެ.
އެޗްއާރުސީއެމްއިން ވަނީ މިހާރު އަމަލުކުރާ ގާނޫނާއި ގަވާއިދު އަދި އުސޫލުތަކުގައި ގައިދީންގެ ބޯކޮށުމާ ގުޅޭ ކަންކަން ހިމަނާފައި އޮތް ގޮތް އިންސާނީ ހައްޤުތަކުގެ ނަޒަރުން ބަލައި އިސްލާޙުކުރުމަށް ކަމާގުޅޭ އިދާރާތަކަށް އަންގާފައެވެ.
