މި މަޝްވަރާ ކުރެއްވީ އެންޑީއޭގެ 9ވަނަ ބޯޑު ބައްދަލުވުމުގައި ކަމަށް ހޯމް މިނިސްޓްރީން މައުލޫމާތުދެއެވެ.
މި ބައްދަލުވުމުގައި ބޯޑުން ވަނީ ތިނަދޫ ޑިޓޮކްސް ސެންޓަރުން ދެމުން ގެންދާ ހިދުމަތްތައް އިތުރަށް ހަރުދަނާ ކުރުމާ ގުޅޭ ގޮތުންނާއި ޕްރޮގްރާމްތަކަށް ފެސިލިޓޭޓަރުންނަށް ލައިސަންސް ދޭނެ މިންގަނޑެއް ކަނޑައެޅުމަށް މަޝްވަރާކޮށްފައެވެ.
އޭގެއިތުރުން ޑްރަގް ކޯޓާއި ސީއެސްސީއާއެކު ކުރަން ޖެހޭ މުހިންމު ކަންކަމާ ގުޅޭ ގޮތުންވެސް މަޝްވަރާކުރުމަށް ވެސް ބޯޑުން ނިންމާފައިވާކަމަށް ހޯމް މިނިސްޓްރީން ފާހަގަކުރެއެވެ.
ސަރުކާރުން އެންޑީއޭގެ މަސައްކަތަށް އަދި މަސްތުވާތަކެތީގެ ފަރުވާދޭ ނިޒާމްތައް ހަރުދަނާކުރުމަށްޓަކައި ކުރާ ހޭދަވަނީ އެތަކެއް ގުނައެއް އިތުރުކޮށްފައެވެ.
ހޯމް މިނިސްޓްރީއިން ގދ އަތޮޅުގައި ހިމެނޭ 8 ރަށު ކައުންސިލާއި ތިނަދޫ ސިޓީ ކައުންސިލާއެކު އެމްއޯޔޫއެއްގައި ދާދި ފަހުން ވަނީ ސޮއިކޮށްފައެވެ.
މި އެމްއޯޔޫތަކުގެ މަގްސަދަކީ ކުށް މަދުކުރުމަށް ކުރަންޖެހޭ މަސައްކަތް ދެނެގަތުމާ، ރަށުގެ ސަލާމަތާއި ރައްކާތެރިކަމުގެ ހާލަތާއި ގުޅޭގޮތުން ދާހިލީ ވުޒާރާއަށް ލަފާއަރުވައި، ރަށުގެ ކުށްމަދުކުރުމަށް އެ ރަށެއްގައި މާހައުލުގައި ހިމެނޭ ފަރާތްތަކާއިއެކު މަސައްކަތް ކުރުމަށް ކޮމެޓީތަކެއް އެކުލަވާލުން ކަމުގައި ހޯމް މިނިސްޓްރީން ބުނެއެވެ. އަދި މި ކޮމެޓީތައް ހޯމް މިނިސްޓަރީއާއެކު މަސައްކަތް ކުރަމުންދާއިރު ކޮމެޓީތަކުގެ މަސައްކަތް ވިލަސްރެސް ކުރާނީ ކައުންސިލްތަކުގެ ބެލުމުގެ ދަށުން ކަމަށް އެ މިނިސްޓްރީން މައުލޫމާތުދެއެވެ.
މިއީ ކުށްމަދު ކުރުމަށް ރަށު ރައްޔިތުންގެ އެކުލެވޭހެން އެއްބަސްވުންތަކެއްގެ ދަށުން މަސައްކަތް ކުރެވޭ ފުރަތަމަ ފަހަރެވެ. އަދި ހުވަދު އަތޮޅު ދެކުނުބުރީގައި މިމަސައްކަތް ފެށުނު ނަމަވެސް އަމާޒަކީ ރާއްޖޭގެ ހުރިހާ ކައުންސިލާއިއެކު އެއްބަސްވުންތަކަކަށް އައިސް ކޮމެޓީތައް ގާއިމްކުރުން ކަމުގައި އެ ހޯމް މިނިސްޓްރީން ބުނެއެވެ.
އޭގެއިތުރުން މި އެއްބަސްވުންތަކާއެކު، ހޯމް މިނިސްޓްރީގެ ދަށުން ހިންގާ ހުރިޙާ އިދާރާއެއްގެ ހިދުމަތްތައް ރަށްރަށުގައި ދިނުމަށް ކައުންސިލްތަކުގެ ގާބިލީއްޔަތުކަން ހުރިމިންވަރަކުން މަސައްކަތް ކުރުމަށް ހަމަޖެހިފައިވާކަމަށް އެ މިނިސްޓްރީން ބުނެއެވެ.
