ދިއްދޫ ޖޫނިއާ ކޮލެޖެ މަސައްކަތް ނިމި، ހއ.ދިއްދޫގެ ޖޫނިއަރ ކޮލެޖްގައި ކިޔަވައިދޭން ފަށާނެކަމަށް ލަފާކުރަނީ 2025 ވަނަ އަހަރު ކަމަށް ހަޔާ އެޑިއުކޭޝަން މިނިސްޓްރީން ބުނެއެވެ.
ދިއްދޫގައި ގާއިމުކުރާ ޖޫނިއާ ކޮލެޖު އިމާރާތްކުރުމުގެ މަސައްކަތުން ބޮޑު ބައެއް މިހާރު ނިމިފައިވާއިރު ކޮންކްރީޓް ހުރިހާ މަސައްކަތްތަކެއް ނިމި، ރޭނުމާއި ސިމެންތި ޖެހުމުގެ މަސައްކަތުގެ ބޮޑުބައެއް ވެސް މިހާރު ވަނީ ނިމިފައި ކަމަށް ހަޔާ އެޑިއުކޭޝަން މިނިސްޓްރީން ފާހަގކުރެއެވެ.
މީގެ އިތުރުން، އެ އިންސްޓިޓިއުޓް ހިންގުމުގެ އިދާރީ މަސައްކަތްތަށް ކުރުމަށް ތައްޔާރުވުމުގެ އިތުރުން ކިޔަވައިދިނުމަށް ބޭނުންވާ އިންތިޒާމުތައް ހަމަޖެއްސުމުގެ މަސައްކަތްތައް ވެސް ކުރިއަށް ދަމުން އަންނަކަމަށް އެ މިނިސްޓްރީން ބުނެއެވެ.
ދިއްދޫ ޖޫނިއާ ކޮލެޖު އަޅަމުން ދަނީ 30،000 އަކަ ފޫޓުގެ ބިމެއްގައެވެ. އަދި އެއީ 2 ބުރީގެ އިމާރާތެކެވެ.
އެ ކޮލެޖުގައި އެކޮމޮޑޭޝަން ބްލޮކާއި ލެބޯޓްރީ ފެސިލިޓީތަކާއި މަލްޓިޕާޕަސް ވޯކްޝޮޕެއްގެ އިތުރުން ކްލާސްރޫމްތަކާއި ސްޓަޑީ ރޫމްތަކާއި އޮޑިޓޯރިއަމް އާއި ލައިބްރަރީ އަދި ސްޓޫޑެންޓް ސާވިސަސް ސެކްޝަނެއް ހިމެނޭނެއެވެ. އަދި އެ ކޮލެޖުގައި އެކްޓިވިޓީ ސެންޓަރަކާއި ޖިމްނެޒިއަމެއް ވެސް ގާއިމް ކުރުމަށް ވަނީ ހަަމަޖެހިފައެވެ.
