މި ދަތުރުފުޅުގައި ރައީސް ވަނީ އިންޑިއާގެ ތިން މުހިންމު ސިޓީއަކަށް ޒިޔާރަތްކުރައްވާފައެވެ.
ބެންގަލޫރުގައި ރައީސް މުއިއްޒު ބައިވެރިވެވަޑައިގަންނަވާނީ ބިޒްނަސް ފޯރަމެއްގައެވެ. މި ފޯރަމްގައި ރާއްޖޭގައި އިންވެސްޓްކުރުމަށް ހުރި ފުރުސަތުތަކާ ބެހޭ މައުލޫމާތު ވިޔަފާރިވެރިންނަށް އޮޅުންފިލުވައިދެއްވުމަށް ވަނީ ހަމަޖެހިފައެވެ. މީގެ އިތުރުން، ބެންގަލޫރުގައި ދިރިއުޅޭ ދިވެހިންނާވެސް ރައީސް ބައްދަލުކުރައްވާނެ ކަމަށް ބެލެވެއެވެ.
މި ދަތުރުފުޅުގައި ކުރިން ރައީސް ވަނީ މުންބާއީ އަދި ނިއު ދިއްލީގައިވެސް މިފަދަ ބިޒްނަސް ފޯރަމްތަކެއް ބާއްވަވާފައެވެ. އަދި މުންބާއީގައި ބޮލީވުޑްގެ މަޝްހޫރު ބައެއް ތަރިންނާ ބައްދަލުކުރައްވައި، ރާއްޖޭގެ ފަތުރުވެރިކަން އިޝްތިހާރުކޮށްދިނުމަށް އެދިވަޑައިގެންނެވިއެވެ.
ރައީސް މުޢިއްޒު އަދި އަނބިކަނބަލުން ސާޖިދާ މުހައްމަދު މާދަމާގެ ވަގުތެއްގައި ރާއްޖެ ވަޑައިގަންނަވާނެ ކަމަށް ބެލެވެއެވެ. މި ދަތުރުފުޅަކީ ދެ ގައުމުގެ ގުޅުން އިތުރަށް ބަދަހިކޮށް، އިގްތިސާދީ ގުޅުންތައް ވަރުގަދަކުރުމަށް މަގުފަހިވާނެ ދަތުރުފުޅެއް ކަމަށް ސަރުކާރުން ވަނީ ފާހަގަކޮށްފައެވެ.
