މި ރިޕޯޓުގައި ބަޔާންކޮށްފައިވާ ގޮތުގައި ރާއްޖޭގެ ބޭރު ފައިސާގެ ރިޒާވު މިހާރު ހުރީ 442 މިލިއަން ޑޮލަރުގައެވެ. މިއީ ގާތްގަނޑަކަށް ދޮޅު މަހުގެ އިމްޕޯޓަށް ބޭނުންވާ ފައިސާގެ އަދަދެވެ. މީގެ އިތުރުން، ސޮވެރިން ޑިވެލޮޕްމެންޓު ފަންޑުގައި ހުރި 65 މިލިއަން ޑޮލަރަކީ ރާއްޖެއަށް ބޭނުންވާ ބޭރު ފައިސާގެ ވަރަށް ކުޑަ މިންވަރެއް ކަމަށް ވޯލްޑް ބޭންކުން ފާހަގަކޮށްފައިވެއެވެ.
ރާއްޖޭގެ އިގުތިސާދީ ހާލަތު ރަނގަޅުކުރުމަށް އަވަސް ފިޔަވަޅުތަކެއް އަޅަން ޖެހޭކަމަށް ވޯލްޑް ބޭންކުން ގޮވާލައިފައިވެއެވެ. މިގޮތުން، މާލީ އިސްލާހީ ފިޔަވަޅުތައް ވީ އެންމެ އަވަހަކަށް ތަންފީޒުކުރުމަށާއި، ހަރަދުތައް ކުޑަކުރުމަށް ފިޔަވަޅުތައް އެޅުމަށް އެ އިދާރާއިން އިލްތިމާސްކޮށްފައިވެއެވެ. އަދި ޓެކްސް ނިޒާމަށް ގެންނަން ނިންމާފައިވާ ބަދަލުތައް ގެނައުން އަވަސްކުރުމަށް ވެސް ވަނީ ގޮވާލާފައެވެ.
ވޯލްޑް ބޭންކުން ރާއްޖެ، ނޭޕާލް އަދި ސްރީ ލަންކާއަށް ކަނޑައަޅާފައި ހުންނަވާ ރީޖަނަލް ކަންޓްރީ ޑިރެކްޓަރު ޑޭވިޑް ސިސްލެން ވިދާޅުވެފައިވަނީ ރާއްޖޭގެ ތަރައްގީގެ އުންމީދުތައް ހާސިލްކުރުމުގައި ފާހަގަކުރެވޭ ކުރިއެރުންތަކެއް ލިބިފައިވީ ނަމަވެސް، މިހާރު ކުރިމަތިވެފައިވާ މާލީ ގޮންޖެހުންތަކަށް ހައްލު ހޯދުމަކީ ކޮންމެހެން މުހިންމު ކަމެއް ކަމަށެވެ. އަދި ހަރަދު ކުޑަކުރުމަށް އަޅަން ޖެހޭ ފިޔަވަޅުތައް އަޅައި، ދައުލަތުގެ ހަރަދުތައް ހަރުދަނާގޮތެއްގައި ކުރިއަށް ގެންދިއުމަކީ މިވަގުތު ކޮންމެހެން ބޭނުންތެރި ކަމެއް ކަމަށް އޭނާ ވަނީ ފާހަގަކުރައްވާފައެވެ.
