މިނިސްޓަރު މިހެން ވިދާޅުވީ ދުނިޔޭގެ ނަފްސާނީ ދުޅަހެޔޮކަމުގެ ދުވަހާ ގުޅުވައިގެން ދެއްވި ހިތާބެއްގައެވެ.
މިނިސްޓަރު ވިދާޅުވިގޮތުގައި ދުނިޔޭގެ ނިސްބަތުން ކޮންމެ 8 މީހަކުން އެކަކީ ނަފްސާނީ އުނދަގޫތަކެއް ތަހައްމަލުކުރަމުންދާ މީހެއްކަން ދުނިޔޭގެ ސިއްހަތު ޖަމްއިއްޔާއިން ވަނީ ފާހަގަކޮށްފައެވެ. އަދި 2022 ވަނަ އަހަރުގެ ޑަބްލިޔު އެޗް އޯ ގެ ސްޓެޕް ސާވޭއިން ހާމަވެފައިވާގޮތުން، ޑިޕްރެޝަންގެ އަލާމާތްތައް ކޮންމެ 5 މީހަކުން އެކަކު ތަހައްމަލުކުރާކަން ފާހަގަކުރެއްވިއެވެ.
މިނިސްޓަރު ނާޒިމް އިތުރަށް ވިދާޅުވީ ނަފްސާނީ ބަލިތަކަށް ކުރިއާލާ ރައްކާތެރި ނުވެވިއްޖެނަމަ، ފަރުވާ ދިނުމަށް ހުންނަ ގިނަ ގޮންޖެހުންތަކުގެ އިތުރުން ބޮޑު ހޭދައެއް ކުރަންޖެހޭ ކަމަށެވެ. އަދި ނަފްސާނީ ބަލިތަކާއި ހާލަތްތަކުގެ ސަބަބުން، މަސައްކަތް ނުކުރެވުމާއި ގަވާއިދުން މަސައްކަތުގައި ޝާމިލު ނުވެވުމުގެ ސަބަބުން، އާއިލާތަކަށް ލިބޭ އާމްދަނީއަށާއި އަދި ގައުމުގެ އުފެއްދުންތެރިކަމަށް ނޭދެވޭ އަސަރުތަކެއް ކުރާ ކަމަށްވެސް ވިދާޅުވިއެވެ.
މިކަމަށް ހައްލެއް ހޯދުމުގެ ގޮތުން، ރައީސް ޑރ. މުހައްމަދު މުއިއްޒުގެ ސަރުކާރުގެ އަމާޒަކީ ނަފްސާނީ ސިއްހަތަށް ފުޅާ ދާއިރާއެއްގައި އިންވެސްޓްކޮށް، ނަފްސާނީ ސިއްހަތުގެ ރަނގަޅު ފަރުވާ ފަސޭހައިން ލުއިގޮތެއްގައި ލިބޭނެ އިންތިޒާމު ހަމަޖެއްސުން ކަމަށް މިނިސްޓަރު ވިދާޅުވިއެވެ. މީގެ ތެރޭގައި ނަފްސާނީ ދުޅަހެޔޮކަމުގެ ފަރުވާ އަތޮޅުތަކަށް ފުޅާކުރުމާއި، ނަފްސާނީ ސިއްހަތުގެ ހެލްޕްލައިން ނަންބަރެއްގެ ގޮތުގައި 1677 ހަމަޖައްސައި، އެ ހިދުމަތް ކޮންމެ ގަޑިއެއްގައިވެސް ލިބޭނެ އިންތިޒާމު ހަމަޖެއްސުން ހިމެނެއެވެ.
