އީސީން ވަނީ ސިޔާސީ ޕާޓީތަކުގެ ގާނޫނަށް ދެ އިސްލާހެއް ގެންނަން އިލެކްޝަންސް ކޮމިޝަނުން ވަނީ ނިންމާފައެވެ. އޭގެތެރޭގައި ހިމެނެނީ ޕާޓީތަކަށް ދައުލަތުގެ ބަޖެޓުން ފާއިސާ ދޫކުރާ ގޮތް ބަދަލުކުރުމާއީ ސިޔާސީ ޕާޓީތަކުގެ ކޮންގްރެސް 5 އަހަރުތެރޭ ބާއްވަން ޖެހޭގޮތަށް އޮންނަ އޮތުން ބަދަލުކޮށް ކޮންގްރެސް ލަސްކުރެވިދާނެ ގޮތްތަކެއް ހިމެނުމެވެ.
ކޮމިޝަނުން ގެންނަން އެދޭ އިސްލާހުގައި ވަނީ ސިޔާސީ ޕާޓީތަކަށް ފައިސާ ދޫކުރަން ބަޖެޓްގައި ހިމެނޭ ފައިސާ 4 ބަޔަކަށް ބަހާލުމަށް ހިމަނާފައެވެ.
އީސީން ބުނީ މި އިސްލާހުތަކަކީ 2019 ވަނަ އަހަރުން ފެށިގެން ސިޔާސީ ޕާޓީތަކާއެކު ފުޅާ ދާއިރާއެއްގައި މަޝްވަރާކުރެވި، ސިޔާސީ ޕާޓީތަކުން އެއްބަސްވެފައިވާ އިސްލާހުތަކެއްކަމަށެވެ. އަދި މި އިސްލާހުތަކަށް މަޝްވަރާ ކުރުމަށް ހުރިހާ ސިޔާސީ ޕާޓީތަކަށް ދައުވަތުދީގެން މިމަހުގެ 8 ވަނަދުވަހު ބައްދަލުވުމެއް ބެއްވިކަމަށްވެސް އިލެކްޝަންސް ކޮމިޝަނުން ބުނެއެވެ.
އެ ބައްދަލުވުމުގައި ބައިވެރިވީ ދިވެހި ރައްޔިތުންގެ ޑިމޮކްރެޓިކް ޕާޓީ، ޖުމްހޫރީ ޕާޓީ، މޯލްޑިވްސް ޑިވެލޮޕްމަންޓް އެލަޔަންސް އަދި މޯލްޑިވްސް ނޭޝަނަލް ޕާޓީ، އަދި ކޮމިޝަނުގެ ފަސް މެމްބަރުންނާއި ސެކްރެޓަރީ ޖެނެރަލްގެ އިތުރުން ގުޅުންހުރި ސެކްޝަންތަކުގެ ވެރިންކަމަށް އީސީން ބުނެއެވެ.
ސިޔާސީ ޕާޓީގެ ޤާނޫނަށް ގެންނަން މި ހުށަހަޅާ އިސްލާޙުތަކުގެ ސަބަބުން، ސިޔާސީ ޕާޓީތަކުގެ ދަފްތަރު ޒަމާނީ ޑިޖިޓަލް ނިޒާމަކަށް ބަދަލުކުރުމުގެ ފުރުސަތު ފަހިވެ، ސިޔާސީ ޕާޓީތަކުގެ ހިންގުން ހަރުދަނާވެ، އިތުރު ފަސޭހަތަކެއް ލިބިގެން ދާނެކަމަށް އިލެކްޝަންސް ކޮމިޝަނުން ބުނެއެވެ.
