ރައީސް މިހެން ވިދާޅުވީ ރާއްޖޭގައި ޔޫއެންޑީޕީ ހަރަކާތްތެރިވާން ފެށިތާ 45 އަހަރުވުމާއި ގުޅިގެން ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ރައީސް މުއިއްޒު ވިދާޅުވީ އެންމެ ކުޑަކޮށް ތަރައްގީވެފައިވާ ގައުމުތަކުގެ ލިސްޓުން ތަރައްގީވަމުންދާ ގައުމުތަކުގެ ލިސްޓަށް ރާއްޖެ ކުރިއަށް ޖެހިލިއިރު ޔޫއެންޑީޕީގެ ދައުރު ރާއްޖޭގެ ތަރައްގީގައި ވަރަށް މުހިއްމު ކަމަށެވެ.
ރައީސް ވިދާޅުވީ ދިވެހިރާއްޖޭގައި މީގެކުރިން ނެތް އަސާސީ އެތައް ހިދުމަތްތަކެއް މިއަދު ރާއްޖޭގައި އެބަހުރި ކަމަށެވެ. ދިވެހި ރައްޔިތުންނަށް މި ހިދުމަތްތައް ހޯދައިދިނުމަށް ޔޫއެންޑީޕީގެ ތެރެއިން ވަރަށް ބޮޑު އެހީތެރިކަމެއް ލިބިފައިވާ ކަމަށްވެސް ވިދާޅުވި އެވެ.
ރައީސް ވިދާޅުވީ ފާއިތުވެދިޔަ މާޒީގައި ރާއްޖެއަށް އެހީތެރިކަން ފޯރުކޮށްދީފައިވާ ގޮތަށް، ޤައުމުގެ ތަރައްގީއަށް މިހާރު ކުރަމުންދާ މަސައްކަތުގައިވެސް ޔޫއެންޑީޕީގެ އެހީތެރިކަން ލިބިގެންދާނެކަން ޔަގީން ކުރައްވާކަމަށެވެ.
ރައީސް ޑރ.މުއިއްޒު ވަނީ ޑިޖިޓަލް އިގްތިސާދާއި ދެމެހެއްޓެނިވި ތަރައްގީ އަށް ވަރަށް ބޮޑަށް ސަމާލުކަންދީ، 2040 ވަނަ އަހަރުގެ ނިޔަލަށް ރާއްޖެއަކީ ފުރިހަމައަށް ތަރައްގީވެފައިވާ ގައުމަކަށް ހެދުމަށް އެމަނިކުފާނުގެ ވެރިކަމުގައި ގެންގުޅުއްވާ ތަސައްވުރުތަކާ ގުޅޭ ގޮތުން ވެސް ވާހަކަފުޅު ދައްކަވައިފަ އެވެ.
ރާއްޖެއާއި ޔޫއެންޑީޕީގެ ގުޅުމަށް 45 އަހަރު ފުރުން ފާހަގަކުރުމަށް ބޭއްވި ރަސްމިއްޔާތު. - ފޮޓޯ: ރައީސް އޮފީސް
ރައީސް ވިދާޅުވީ، ގޮންޖެހުންތައް ގިނަ ނަމަވެސް ވިލުންވެރި، އެންމެން ޝާމިލްވާ ރާއްޖެއެއް ބިނާކުރުމަށް ކުރާ ދަތުރުގައި ޔޫއެންޑީޕީ ރާއްޖެއާ އެކުގައިވާ ނަމަ، ކާމިޔާބުވާނެ ކަމުގެ ޔަގީންކަން އެބައޮތް ކަމަށެވެ.
ޔޫއެންޑީޕީގެ އޮފީހެއް ރާއްޖޭގައި އެންމެ ފުރަތަމަ ހުޅުވީ 1978 ވަނަ އަހަރު އެވެ.
