މިކަން ފާހަގަކޮށްފައިވަނީ އޭސީސީން ހަދާފައިވާ ރާއްޖޭގެ ސިއްހީ ވެލްފެއާ ނިޒާމުގެ ކޮރަޕްޝަން ރިސްކް އެސެސްމަންޓުގައެވެ.
އޭސީސީގެ ރިޕޯޓުގައި ބުނެފައިވާ ގޮތުގައި، ބޭހުގެ އަގު ކަނޑައެޅުމުގެ އިތުރުން ރާއްޖެ އެތެރެކުރާ ބޭހުގެ ސްޓޮކް ސެންޓްރަލީ ބަލަހައްޓާނެ ނިޒާމު މޮނިޓަރކުރާނެ ގޮތެއްވެސް ލިޔުމުން އެކުލަވާލާފައި ނުވެއެވެ. މީގެ އިތުރުން، ބޭހުގެ ބާރު ނުވަތަ ސްޓްރެންތާއި ވޮލިއުމްއަށް ބަލައި ވިއްކާނެ އަގުތައް ކަނޑައަޅާފައި ނުވާކަންވެސް ވަނީ ފާހަގަކޮށްފައެވެ.
މި ކަންކަމުގެ ސަބަބުން ކޮރަޕްޝަނަށް މަގުފަހިވެ، އާސަންދައިން ފޯރުކޮށްދޭ ސިއްހީ ހިދުމަތްތައް ލަސްވެގެންދާކަމަށް އޭސީސީން ބުނެފައިވެއެވެ. އަދި މިކަމަކީ ރައްޔިތުންގެ ދުޅަހެޔޮކަމާއި ފުރާނައާ ގުޅިފައިވާ މުހިންމު ކަމަކަށްވާތީ، ބޭހާ ގުޅޭ ކަންކަމުގައި ނަޒާހަތްތެރިކަން ކަށަވަރުކޮށް ކޮރަޕްޝަން ހުއްޓުވުމަށް އެކަށީގެންވާ ގަވާއިދުތައް އެކުލަވާލުމަށް އޭސީސީން ވަނީ ލަފާދީފައެވެ.
ސިއްހީ ނިޒާމުގައި ހުރި މިފަދަ މައްސަލަތައް ހައްލުކުރުމަށް އޭސީސީން ވަނީ ޖުމްލަ 20 ލަފައެއް ދީފައެވެ. މީގެ ތެރޭގައި ކޮރަޕްޝަނަށް މަގުފަހިވާ ކަންކަން ހައްލުކޮށް، ހަމަހަމަކަމާއެކު ވެލްފެއަރގެ ނިޒާމު ދެމެހެއްޓުމަށް 14 ލަފައަކާއި، މުޅި ސިއްހީ ނިޒާމު ހަރުދަނާކުރުމަށް 6 ލަފައެއް ހިމެނެއެވެ.
