މާފުށްޓަށް ޒިޔާރަތްކުރި ފަތުރުވެރިންގެ އަދަދު ވަނީ 135،000 އަށް ވަނީ މިއަހަރު މިހާތަނަށް އަރާފައެވެ. މިއީ ރާއްޖެއަށް އައި ފަތުރުވެރިންގެ ގާތްގަނޑަކަށް 10 އިންސައްތައެވެ. އަދި މި އަހަރު ނިމޭއިރު މާފުށްޓަށް ޒިޔާރަތްކުރާ ފަތުރުވެރިންގެ އަދަދު 200،000 ހުރަސްކުރާނެ ކަމަށް ބެލެވެއެވެ.
މާފުށްޓަކީ ރާއްޖޭގައި އެންމެ ފުޅާ ދާއިރާއެއްގައި ލޯކަލް ޓޫރިޒަމްގެ ވިޔަފާރި ކުރާ ރަށެވެ. އެ ރަށުގައި ކާނި ހޮޓެލްސް، އެރީނާ ހޮޓެލްސް، އަދި ޓްރައިޓަން ފަދަ ބޮޑެތި ކުންފުނިތަކުން ގެސްޓްހައުސްގެ ވިޔަފާރި ކުރަމުން ގެންދެއެވެ. މި އަހަރުގެ ސެޕްޓެމްބަރު މަހުގެ ނިޔަލަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ކާނި ހޮޓެލްސްގެ ގެސްޓްހައުސްތަކަށެވެ. އެއީ 31،230 ފަތުރުވެރިންނެވެ.
މާފުށި ރައްޔިތުން އެދޭ ވަރަށް އެ ރަށް ތަރައްގީ ނުވެ އޮތުމަކީ އެ ރަށުގެ ރައްޔިތުންގެ ކަންބޮޑުވުމެކެވެ. އެ ރަށުން އެތައް މިލިއަން ޑޮލަރެއް ދައުލަތަށް ލިބޭ ނަމަވެސް، ރަށުގެ ތަރައްގީއަށް އެކަށީގެންވާ ވަރަށް ސަމާލުކަން ނުދޭ ކަމަށް ރައްޔިތުން ދެކެއެވެ. އެހެންނަމަވެސް، ކައުންސިލުން މި ބޮޑު އަމާޒު ކަނޑައެޅުމާއެކު، ރަށުގެ ތަރައްގީއަށް އިތުރު ފުރުސަތުތަކެއް ހުޅުވިގެންދާނެ ކަމަށް ގިނަ ބަޔަކު އުންމީދު ކުރެއެވެ.
