މި ވާހަކަ ޑރ. ކިނާނަތު ވިދާޅުވީ ސައިބަރ ސެކިއުރިޓީ އަދި ނޭޝަނަލް އާޓިފިޝަލް އިންޓެލިޖެންސްއާ ގުޅޭގޮތުން ބޭއްވުނު ސިމްޕޯސިއަމްއެއްގައެވެ.
ޑރ. ކިނާނަތު ވިދާޅުވި ގޮތުގައި، ދުނިޔޭގެ ފެންވަރުގައި އޭއައި ޓެކްނޮލޮޖީ ކުރިއަރަމުންދާ ހަލުވިމިނަށް ބަލާއިރު، ރާއްޖެއިންވެސް މި ދާއިރާއަށް އިސްކަންދޭން ޖެހެއެވެ. އަދި ރާއްޖޭގެ ސިސްޓަމްތައް ޑިޒައިންކުރުމުގައި އޭއައި ބޭނުންކުރުމަކީ މުހިންމު ކަމެއް ކަމަށް އޭނާ ފާހަގަކުރެއްވިއެވެ.
މި ސިމްޕޯސިއަމްގައި ސަރުކާރުގެ އެކި މުއައްސަސާތަކުގެ ޓެކްނިކަލް އަދި ނޮން-ޓެކްނިކަލް މުވައްޒަފުން ބައިވެރިވިއެވެ. ސްޓޭޓް މިނިސްޓަރު އިތުރަށް ވިދާޅުވި ގޮތުގައި، ނޭޝަނަލް ސެންޓަރ ފޯ އިންފޮމޭޝަން ޓެކްނޮލޮޖީ (އެންސީއައިޓީ) އިން އޭއައިއާ ބެހޭ ހޭލުންތެރިކަން އިތުރުކުރުމުގެ ޕްރޮގްރާމްތައް ހިންގައި، އޭގެ މުހިންމުކަން ރައްޔިތުންނަށް އަންގައިދޭނެއެވެ.
އެންސީއައިޓީން މިހާރުވެސް އާޓިފިޝަލް އިންޓެލިޖެންސްގެ މަސައްކަތްތައް ރާވައި ހިންގުމަށް ގިނަ މަސައްކަތްތަކެއް ކުރަމުންދާ ކަމަށް ޑރ. ކިނާނަތު ފާހަގަކުރެއްވިއެވެ. މީގެ އިތުރުން، ސައިބަރ ސެކިއުރިޓީގެ މުހިންމުކަމަށްވެސް އަލިއަޅުވާލައްވައި، ސައިބަރ ހަމަލާތަކުން ރައްކާތެރިވުމަށް ބޮޑެތި ގައުމުތަކުން ކުރަމުންދާ މަސައްކަތްތައް ރާއްޖެއިންވެސް ކުރަން ޖެހޭ ކަމަށް އޭނާ ވިދާޅުވިއެވެ.
