އިންތިހާބުތަކާ ބެހޭ ގާނޫނުތައް އެއްކޮށްލުމަށް އިލެކްޝަންސް ކޮމިޝަނުން ގޮވާލައިފިއެވެ. މި މަޢުލޫމާތު ހާމަކުރެއްވީ އިލެކްޝަންސް ކޮމިޝަންގެ ރައީސް ފުވާދު ތައުފީގެވެ. ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ފުވާދު ވިދާޅުވީ، އިންތިހާބުތަކާ ބެހޭ ހުރިހާ ގާނޫނެއް މުތާލިއާ ކުރުމަށްފަހު، އެ ހުރިހާ ގާނޫނުތަކެއް އެއްކޮށްލުމުގެ ވިސްނުން ގެންގުޅުއްވާ ކަމަށެވެ.
މިހާރު ރާއްޖޭގައި އިންތިހާބުތަކާ ބެހޭ ގިނަ ގާނޫނުތަކެއް ވަކިވަކިން އެބަހުއްޓެވެ. މީގެ ތެރޭގައި އިންތިހާބުތަކާ ބެހޭ އާންމު ގާނޫނާއި، ރިޔާސީ އިންތިހާބާ ބެހޭ ގާނޫނާއި، ރައްޔިތުންގެ މަޖިލީހުގެ އިންތިހާބާ ބެހޭ ގާނޫނުގެ އިތުރުން ލޯކަލް ކައުންސިލްތަކުގެ އިންތިހާބާ ބެހޭ ގާނޫނު ހިމެނެއެވެ. ފުވާދު ވިދާޅުވީ ގާނޫނުތައް ވަކިން ހުރުމުގެ ސަބަބުން އާންމު ރައްޔިތުންނަށްވެސް ބައެއް ކަންކަން އޮޅުން އަރާ ކަމަށެވެ.
އިލެކްޝަންސް ކޮމިޝަންގެ ރައީސް އިތުރަށް ވިދާޅުވީ، އެއް ގާނޫނަކުން ހުރިހާ ކަމެއް ފެންނަން ހުރުމުން އެއްހަމައަކުން ކަންކަން ކުރުމަށް އިލެކްޝަންސް ކޮމިޝަނަށްވެސް ފަސޭހަވާނެ ކަމަށެވެ. މި މަސައްކަތް ކުރުމަށްޓަކައި އެ ކޮމިޝަންގެ މެންބަރުންނާއި ގާނޫނީ ޓީމާއެކު މަޝްވަރާތައް ކުރަމުން ގެންދަވާ ކަމަށް ފުވާދު ވިދާޅުވިއެވެ.
2026 ވަނަ އަހަރު ބާއްވަންޖެހޭ އިންތިހާބުތަކުގެ ކުރިން މިހާރު ހުރި ގާނޫނުތަކަށް އިސްލާހެއް ގެންނަން ޖެހޭނަމަ އެކަން ކުރުމަށާއި އަލަށް ގާނޫނެއް ހަދަން ޖެހޭ ކަމުގައި ވަނީނަމަ އެކަމުގެ މަސައްކަތްތައް ކުރައްވާނެ ކަމަށްވެސް ފުވާދު ވިދާޅުވިއެވެ. މި މަސައްކަތުގެ ތެރެއިން އިންތިހާބުތަކާ ބެހޭ ގާނޫނުތައް އެއްކޮށްލުމަކީ އިލެކްޝަންސް ކޮމިޝަނުގެ މުހިންމު އަމާޒެއް ކަމަށް ފުވާދު ފާހަގަކުރެއްވިއެވެ.
