މިދިޔަ މޭ މަހުގެ ތެރޭގައިވެސް ހުޅުމާލޭ ބީޗް ސައިޑުން 13 ބިމެއް ވިއްކުމަށް ހުޅުވާލިއެވެ. އަދި މިދިޔަ މަހުވެސް އެ ދައަހްއަދުން ބިންތަކެއް ވިއްކުމަށް ވަނީ ހުޅުވާލާފައެވެ.
އެ ލިސްޓަށް އިތުރު 18 ބިމެއް އިތުރުކޮށް، މިއަދު އެޗްޑީސީން އެ ބިންތަކަށް ބީލަން ހުށައެޅުމުގެ ފުރުސަތު ހުޅުވާލާފައެވެ. މިއަދު ހުޅުވާލި ބިންތަކުގެ ތެރޭގައި ހިމެނެނީ ބީޗް ސައިޑުން 16 ދޫކުރާ ބިމަކާއި ބީޗް ފްރަންޓުން ދޫކުރާ ދެ ބިމެކެވެ.
މި ބިންތަކުގެ ތެރޭގައި 1،316 އަކަފޫޓުގެ 15 ބިމެއް ހިމެނެއެވެ. ދެން ހުރީ 1،454 އަކަފޫޓުގެ ބިމަކާއި، 1،261 އަކަފޫޓުގެ ބިމަކާއި 1،584 އަކަފޫޓުގެ ބިމެކެވެ.
އެޗްޑިސީން ބުނީ ދިރިއުޅުމުގެ ބޭނުމަށް ބީލަމުގެ އުސޫލުން ދޫކުރަން ނިންމާފައިވާ މި ބިންތައް ގަތުމަށް އެޕްލިކޭޝަން ހުށަހަލަންޖެހޭނީ އެ ކޯޕަރޭޝަންގެ ބިޑް ޕޯޓަލް މެދުވެރިކޮށެވެ.
މި ބީލަމުގައި ބައިވެރިވެވެނީ ހަމައެކަނި ދިވެހިންނަށްކަމަށް އެޗްޑީސީން ބުނެއެވެ. އޭގެތެރޭގައި 100 އިންސައްތަ ދިވެހިންގެ ހިއްސާ އޮންނަ ކުންފުނިތަކަށްވެސް ބައިވެރިވެވޭނެކަމަށް އެޗްޑީސީން ބުނެއެވެ.
ބީލަން ފެށޭ އަގުތައް
ބީޗު ސައިޑުން އަކަފޫޓަކަށް 4،000 ރުފިޔާ
ފްރަންޓުން އަކަފޫޓަކަށް 4،500 ރުފިޔާ
ބިން ވިއްކުން ކުރިއަށް ގެންދާނީ ދެ މަރުހަލާއަކަށް ބަހާލައިގެންކަމަށް އެޗްޑީސީން ބުނެއެވެ. އެއީ ފުރަތަމަ މަރުހަލާއަކީ އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުންކަމަށައި ދެވަނަ މަރުހަލާއަކީ ގަންނަން ކަނޑައަޅާފައިވާ ބިމަށް އެއް ފަރާތަށް ވުރެ ގިނަ ފަރާތުން އީއޯއައި ހުށަހަޅާފައިވާ ނަމަ، ބިޑް ކުރުންކަމަށް އެޗްޑީސީން ބުނެއެވެ.
ޕޯޓަލްގައި ރަޖިސްޓަރީކޮށް މިއަދުން ފެށިގެން ބީލަށް ހުށަހެޅޭނެ ކަމަށާއި އިތުރު މައުލޫމާތު އެ ކޯޕަރޭޝަންގެ ހޮޓްލައިން 1516އިން ލިބޭނެ ކަމަށް އެޗްޑީސީން ބުނެއެވެ.
