މި ފޯރަމަކީ ކްރެޑެސަރނޯޑްސުޑް (އެންޖީއޯ) އިން އިންތިޒާމްކޮށްގެން ކޮންމެ އަހަރަކު ބާއްވާ ފޯރަމެކެވެ. މިއަހަރުގެ ފޯރަމްގައި ރާއްޖެ ތަމްސީލުކުރެއްވީ ބެލްޖިއަމްގައި ހުންނަ ރާއްޖޭގެ އެމްބަސީންނެވެ.
ރާއްޖެއިން ބެލްޖިއަމް އަދި ޔޫރަޕިއަން ޔޫނިއަން އަށް ކަނޑައަޅާފައިވާ ސަފީރު، ސަފީރު ގީލާ އަލީ ވަނީ ރާއްޖޭގައި އިންވެސްޓްކުރުމަށް ހުރި ފުރުސަތުތަކާއި ދާއިރާތަކާ ބެހޭ މައުލޫމާތު ދެއްވާފައެވެ. މީގެ އިތުރުން، އިންވެސްޓް މޯލްޑިވްސްއިން ތައްޔާރުކޮށްފައިވާ ވީޑިއޯ ޕްރެސެންޓޭޝަނެއް ވެސް ހުށަހަޅާފައިވެއެވެ. އަދި ފޯރަމްގެ ބައިވެރިންނަށް ރާއްޖޭގައި އިންވެސްޓްކުރުމަށް ހުރި ފުރުސަތުތަކާބެހޭ މައުލޫމާތު ކަރުދާހެއް ފޯރުކޮށްދީފައިވާކަން ފާހަގަކުރެވެއެވެ.
ހާރިޖީ މިނިސްޓްރީން ބުނީ މި ފޯރަމަކީ ބެލްޖިއަމް/ޔޫރަޕިއަން-އެފްރިކާގެ ގައުމުތަކުގައި ހުރި އިންވެސްޓްމަންޓްތަކާ ގުޅޭގޮތުން ދޭދޭ ގައުމުތަކުގެ މެދުގައި މައުލޫމާތު ބަދަލުކޮށް އިގްތިސާދު ފުޅާކުރުމަށާއި ވިޔަފާރީގެ ފުރުސަތުތަކާ ގުޅޭ މަޝްވަރާކުރެވޭނެ މާހައުލެއް ކަމަށެވެ. މި އަހަރުގެ ފޯރަމްގައި އޭޝިއާގެ ބައެއް ގައުމުތަކުން ވެސް ބައިވެރިވެފައިވާކަން ފާހަގަކުރެވެއެވެ. މިގޮތުން ރާއްޖޭގެ އިތުރުން މިޔަންމާ އަދި ވިއެޓްނާމް އިން އެ ގައުމުތަކުގައި ހުރި އިންވެސްޓްމަންޓް ފުރުސަތުތައް ފޯރަމްގެ ބައިވެރިންނަށް ހުށަހަޅާދީފައިވެއެވެ.
