ދައުލަތުގެ މީޑިއާ މެދުވެރިކުރައްވައި ރައްޔިތުންނަށް މީރާގެ ހާލަތު އޮޅުން ވިލުވައިދެއްވަމުން ޒަރީރު ވިދާޅުވީ، މީރާއިން ކުރަމުންދާ މަސައްކަތްތަކުގެ ނަތީޖާ މިހާރު ފެންނަމުންދާކަމަށެވެ. އޭގެ ތެރޭގައި ބޮޑެތި އަދަދުތަކުން ފައިސާ ދައްކަންޖެހިފައިވާ ފަރާތްތަކާ މަޝްވަރާކޮށް، އެފަރާތްތަކަށް ލުއިގޮތްތަކެއް ހަމަޖައްސައިދިނުން ހިމެނެއެވެ. މިކަމުގެ ސަބަބުން ލިބޭނެކަމަށް އަންދާޒާކޮށްފައިވާ އަދަދުތަކަށްވުރެ އިތުރަށް ފައިސާ މީރާއަށް ލިބެމުންދާކަމަށް އޭނާ ވިދާޅުވިއެވެ.
މީރާއިން މީގެ ކުރން ދީފައިވާ މައުލޫމާތުގައިވާ ގޮތުން، ޓެކްސް އާމްދަނީ އަދި ޓެކްސް ނޫން އާމްދަނީގެ ގޮތުގައި ދައުލަތަށް ނުލިބި ގާތްގަނޑަކަށް 16 ބިލިއަން ރުފިޔާ އެބަހުއްޓެވެ. މީގެ ތެރޭގައި ޖޫރިމަނާގެ ގޮތުގައި އަރާފައިވާ ފައިސާވެސް ހިމެނެއެވެ. މި ފައިސާ ހޯދުމަށް މީރާއިން ދަނީ ގިނަގުނަ މަސައްކަތްތަކެއް ކުރަމުންނެވެ. މި މަސައްކަތްތަކުގެ ނަތީޖާ ފެންނަމުންދާކަމަށް ޒަރީރު ވިދާޅުވެފައިވެއެވެ.
