އާސަންދަ ނިޒާމު އިސްލާހު ކުރުމަށް ގެންނަ ބަދަލުތަކުގެ ތެރޭގައި، އަމިއްލަ އިންޝުއަރެންސް ނަގާފައިވާ ފަރާތްތަކުން ފުރަތަމަ އެ އިންޝުއަރެންސް ބޭނުންކުރުމަށްފަހު އާސަންދައިން ހިދުމަތް ލިބޭނެ ގޮތް ހަމަޖެއްސުން ހިމެނެއެވެ. މިކަމުގެ ސަބަބުން މިހާރު ދިމާވަމުންދާ ޑަބަލް އިންޝުއަރެންސް މައްސަލައަށް ހައްލެއް ލިބިގެންދާނެ ކަމަށް ހީނާ ވިދާޅުވިއެވެ.
އާސަންދަ ސްކީމުގެ ތެރެއިން އިސްރާފުތައް ކުޑަކުރުމަށް އިސްލާހީ ގިނަ ފިޔަވަޅުތަކެއް އެޅުމަށް ސަރުކާރުން އަންނަނީ ތައްޔާރުވަމުންނެވެ. މީގެ ތެރޭގައި ބަލްކް ޕްރޮކިއުމަންޓްގެ ދަށުން ހެޔޮ އަގުގައި ބޭސް ގެނައުން ހިމެނެ އެވެ. ފިނޭންސް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި މި އަހަރުގެ ފުރަތަމަ 6 މަހު އާސަންދަ ސްކީމަށް 918 މިލިއަން ރުފިޔާ ހޭދަކޮށްފައިވެ އެވެ. މިއީ އަހަރަށް ކަނޑައަޅާފައިވާ ބަޖެޓުގެ ގާތްގަނޑަކަށް 50 ޕަސަންޓެވެ.
