ޒަކާތާއި ބެހޭ ހައުސް އިން ބުނީ މިމަހުގެ 10 ވަނަދުވަހުން ފށިގެން މުދަކު ޒަކާތުގެ ނިސާބުގެ މިންވަރު ދަށް ޖެހިފައިވާކަމަށެވެ. އެގޮތުން މިހާރުގެ ނިސާބަކީ 9240. 35 ލާރިކަމަށެވެ.
މިދިޔަ މޭމަހުން 22 ފެށިގެން މިހާތަނަށް މުދަލު ޒަކާތް ވާޖިބުވާ ނިސާބެއްގެ ގޮތުގައި ކަނޑައަޅާފައި އޮތީ 9353.40 ރުފިޔާއެވެ. މި އަހަރުގެ ފެށުނުއިރު މުދަލު ޒަކާތް ވާޖިބުވާ މިންވަރެއްގެ ގޮތުގައި ކަނޑައަޅާފައި 7140 ދިވެހި ރުފިޔާއެވެ.
މުދަލުޒަކާތުގެ ނިސާބަކީ، ތިމާގެ މުދަލުގައި އެ މިންވަރެއް ހަމަވުމުން އެއިން މުދަލުގެ ޒަކާތް ނެރުން ވާޖިބުވާ އެންމެ މަދު މިންވަރެވެ. ފައިސާއިން ޒަކާތް ދައްކާނަމަ، ފައިސާ އަގުކުރެވޭނީ ރަން ނުވަތަ ރިއްސަށެވެ. ފިޤްހީ މަޒުހަބުތަކަށް ބަލާއިރު، ހަނަފީ މަޒްހަބުގައި ނިސާބު ކަނޑައަޅަނީ ރިހީގެ އަގަށް ބަލައިގެންނެވެ. އަދި އެހެން މަޒުހަބުތަކުގައި ރަނުގެ އަގަށް ބަލައިގެންނެވެ.
ދިވެހިރާއްޖޭގައި ނިސާބު ކަނޑައަޅަނީ ރިހީގެ ނިސާބުންނެވެ. އިލްމުވެރިން ވިދާޅުވާ ގޮތުގައި ރިހީގެ އަގުން ފައިސާ އަގުކުރުމަކީ ފަޤީރުންނަށް އެންމެ ފައިދާ ބޮޑު ގޮތެވެ.
އަހަރުގެ އެކި ދުވަސްވަރު ނިސާބުގެ މިންވަރު ދުނިޔޭގެ ބާޒާރުގައި ރިހީގެ އަގަށް އަންނަ ބަދަލާއެކު ތަފާތުވެއެވެ. ޒަކާތް ނެރުން ވާޖިބުވާނީ މުދަލުގައި ނިސާބު ހަމަވެ އަދި އެ މީހެއްގެ މިލްކިއްޔާތުގައި އެމުދަލެއް ހުރެ ހިޖްރީ ގޮތުން އެއް އަހަރު ހަމަވުމުންނެވެ. ޒަކާތް ދައްކާ މުދަލުގެ ބާވަތް ތަފާތުވުމުގެ ސަބަބުން ޒަކާތުގެ ނިސާބު ތަފާތުވެއެވެ.
