މި އަހަރުގެ އޮގަސްޓު މަހުގެ ތެރޭގައި މ. ހަސޯވާ ގެ 10 ވަަނަ ފަންގި ފިލާއިން ވެއްޓުނު އުމުރުން 25 އަހަރުގެ ގއ މާމެންދޫ، ރިފާގު އިބްރާހިމް އަދުނާނު ކިޔާ އަންހެން ކުއްޖާގެ މަރާ ގުޅޭގޮތުން ހޯދިފައިވާ ހޯދުންތަކާއި ގުޅޭގޮތުން ފުލުހުން ވަނީ މިއަދު ޕްރެސްކޮންފަރެންސް އެއް ވެސް ބާއްވާފައެވެ.
އެ ޕްރެސް ކޮންފަރެންސްގައި ފުލުހުން ބުނީ ރިފާގު އުޅޭ އިމާރާތުން ހޯދި ލިޔެކިޔުންތަކުން އެނާ ޑިޕްރެޝަނަށް ބޭސް ކުރަމުން ދިޔަކަން ހާމަވާކަމަށެވެ.
"ނަފްސާނީ ބައްޔަށް ބޭނުންކުރާ ބޭސްތަކެއް ހުރިކަން ފާހަގަވޭ. ދެ ފޯނާ ލެޕްޓޮޕް އަދި މެޑިކަލް ޑޮކިއުމަންޓް ހުރި ފައިލެއް ފުލުހުން ބެލުމުގެ ދަށަށް ނަގާފައިވާނެ،" ފުލުހުން މިއަދު ބުންޏެވެ.
ރިފާގު ޔޫކޭގައި ކިޔަވަން ހުރިއިރު އެއްފަހަރާ ބޭސްތަކެއް އަނގައަށް އަޅައިލައިގެން ހުރެ އެނާގެ މަންމައަށް ވީޑިއޯކޯލެއް ކުރިކަމަށާއި، އޭނާ ބޯ އެއްކޮށް ބާލައިގެން ވެސް އޭނާގެ މަންމައަށް ވީޑިއޯ ކޯލެއް ކުރިމަށް ފުލުހުން ބުންޏެވެ.
ފުލުހުން ބުނީ އޭނާ އިނގިރޭސި ވިލާތުގައި ހުއްޓައި މާލެ ގެނައީ އޭނާގެ މަންމަގެ އެދުމުގެ މަތިން އޭނާގެ ބައްޕަކަމަށެވެ.
ކަސްޓަމްސް ސަރަހައްދުގައި ހުންނަ މި ބިލްޑިންގުން މީހަކު ވެއްޓިފައިވަނީ އޮގަސްޓު 14 ވަނަ ދުވަހުގެ ހަވީރުއެވެ. ފުލުހުން މައުލޫމާތުދޭ ގޮތުގައި އެ އިމާރާތުން ވެއްޓުނު މީހަކަށް އައިޖީއެމްއެޗް ހޮސްޕިޓަލުގައި ފަރުވާ ދެމުން ދަނިކޮށް މަރުވެފައިވާ ކަމަށެވެ.
ރިފާގު މަރުވި ދުވަހު އެއްވެސް ހަމަނުޖެހުމެއް ނުހިނގާކަމަށް ވެސް އައިލާއާއި ހަވާލާ ދީ ފުލުހުން ބުނެފައިވެއެވެ.
