ރާއްޖެއަށް އިންޑިއާއިން ހަދިޔާކޮށްފައިވާ ޑޯނިއާތައް ދުއްވަމުން އަންނަނީ އިންޑިއާ މީހުންނެވެ. މިދިޔަ ސަރުކާރުގެ އެ އުޅަނދުތައް ދުއްވި އިންޑިއާ ސިފައިން ފޮނުވާލާ މިހާރު އެ އުޅަނދުތައް ދުއްވަމުން އަންނަނީ މި ސަރުކާރުން ގެނައި އިންޑިއާގެ ސިވިލް މީހުންނެވެ.
ޑޯނިއާ ދުއްވަން އެމްއެންޑީއެފްގެ ދެ އޮފިސަރަކު 2021 ވަނަ އަހަރު ވަނީ ތަމްރީނުތައް ފުރިހަމަކޮށްފައެވެ. އެހެންނަމަވެސް މިހާތަނަށްވެސް އެ އޮފިސަރުން ދުއްވަން މި އުޅަނދުތައް ދީފައެއް ނުވެއެވެ.
ދިވެހި އޮފިސަރުން މި ބޯޓްތައް ދުއްވިތޯ ސާފުކުރަން މައުލޫމާތު ހޯދާ ލިބިގަތުމުގެ ގާނޫނުގެ ދަށުން ނޫސްވެރިޔަކު ވަނީ ޑިފެންސް މިނިސްޓްރީއަށް ހުށައަޅާފައެވެ. އެހެންނަމަވެސް އެ މިނިސްޓްރީން ވަނީ އެ މައުލޫމާތަކީ ގައުމީ ސަލާމަތަށް ނުރައްކާ މައުލޫމާތެއް ކަމަށް ބުނެ އެ މައުލޫމާތު ހާމަނުކުރަން ނިންމާފައެވެ.
ނަމަވެސް އެ މައުލޫމާތު ހާމަކޮށްގެން ގައުމީ ސަލާމަތަށް ނުރައްކާވެދާނެ ފަދަ ކަމެއް ހިމެނިގެން ނުވާ ނަމަ އެ މާއްދާ ނުހިނގާނެ ކަމަށް ވެސް ގާނޫނުގައި ބުނެފައިވެ އެވެ.
މި މައްސަލަ އިންފޮމޭޝަން ކޮމިޝަނަރުގެ އޮފީހުން ބެލުމަށްފަހު ވަނީ އެ މައުލޫމާތު ފަސްދުވަހުގެ ތެރޭގައި ދިނުމަށް ޑިފެންސް މިނިސްޓްރީއަށް އަންގާފައެވެ.
އެހެންނަމަވެސް ޑިފެންސް މިނިސްޓްރީން އެ މައުލޫމަތު ނޫދީ އައިކޮމްގެ ނިންމުންް ވަނީ ހައިކޯޓްގައި އިސްތިއުނާފުކޮށްފައެވެ.
