ކުރިން އެފްއޭމްގެ ދަރަނި އޮތީ ގާތްގަޑަކަށް 85 މިލިއަނުގައެވެ. އެހެންނަމަވެސް އިތުރު ކޯޓު ހުކުމަކާއި އެކު އެފްއޭއެމްގެ ދަރަނި މި ވަނީ 150 މިލިއަނާއި ގާތްކޮށްފައެވެ.
ކޯޓުން އެފްއޭމްގެ މައްޗަށް 50 މިލިއަން ދައްކަން ހުކުމްކުރީ ދެކުނު ކޮރެއާގެ ޓީކުއިން ކޮންސްޓްރަކްޝަން ކޯ ލިމިޓެޑަށެވެ. އެއީ އެފްއޭއެމްގެ ރައީސްކަމުގައި ބައްސާމް އަދީލް ޖަލީލް ހުރެ ހުޅުމާލެ އާއި ވިލިމާލޭގައި ދެ ދަނޑު އެޅުމަށް އެ ކުންފުންޏާއި ހަވާލުކޮށް ފައިސާ ދައްކާފައި ނުވާތީއެވެ.
ދެކުނު ކޮރެއާގެ ޓީކުއިން ކޮންސްޓްރަކްޝަން ކޯ ލިމިޓެޑާ އެކު އެފްއޭއެމުން 2021 ގައި ހެދި އެއްބަސްވުމުގެ ދަށުން ފައިސާ ދައްކާފައި ނުވާތީ އެ ކުންފުންޏަށް ލިބުނު ގެއްލުމުގެ ގޮތުގައި 3.2 މިލިއަން ޑޮލަރު (52.1 މިލިއަން ރުފިޔާ) ދެއްކުމަށް ސިވިލް ކޯޓުން ހުކުމް ވަނީ ހުކުމްކޮށްފައެވެ.
އެފްއޭއެމްގެ މައްޗަށް ކޯޓުން ކޮށްފައިވާ ބައެއް ހުކުމްތަކަށް ފައިސާ ނުދައްކައިގެން އެ ހުކުމްތައް މިހާރު ހުރީ ތަންފީޒީ މަރުހަލާގައެވެ.
އެފްއޭއެމްގެ އެކައުންޓަކު އެއްވެސް ލާރިއެއް ނެތްކަމަށާއި، ލާރިއެއް ވަނަސް ވަގުތުން ކަނޑާލާ ކަމަށް ފީފާ އިން ހަމަޖެއްސި އެފްއޭއެމްގެ ނޯމަލައިޒިން ކޮމިޓީން ވަނީ ބުނެފައެވެ. އެފްއޭއެމްގެ ހާލަތު އޮތީ ގިނަ އަހަރުތަކެއްގެ ތެރެއިން ގޯސްވަމުން އައިސް "އެފްއޭއެމް ނެތިދާނެ" ހާލަތުގައި ކަމަށް އެ ކޮމެޓީން ވަނީ ބުނެފައެވެ.
