Advertisement

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ މިނިސްޓަރު އާދަމް ޝަރީފް އުމަރު ބުނެފައިވަނީ މިހާތަނަށް 4 ކައުންސިލަކުން ފަޅުރަށް ހޯދުމަށް ޕްރޮޕޯސަލް ހުށަހަޅާފައިވާ ކަމަށެވެ.

މިނިސްޓަރު ޝަރީފް ވިދާޅުވި ގޮތުގައި މި ޕްރޮޕޯސަލްތައް ހުށަހަޅާފައިވަނީ ރ. އިނގުރައިދޫ، ދ. ކުޑަހުވަދޫ، ލ. މާވަށު ކައުންސިލްގެ އިތުރުން މ. އަތޮޅު ކައުންސިލުންނެވެ. އެހެންނަމަވެސް، މި ކައުންސިލްތަކުން ހުށަހަޅަންޖެހޭ ބައެއް ލިޔުންތައް ހުށަހަޅާފައި ނުވާތީ، އެ ލިޔުންތައް ހޯދުމުގެ މަސައްކަތް ކުރަމުންދާ ކަމަށް އޭނާ ބުނެފައިވެއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ކައުންސިލްތަކަށް ފަޅުރަށް ދޫކުރާ މުއްދަތު 10 އަހަރުން 25 އަހަރަށް އިތުރުކުރުމަށް ނިންމަވާފައެވެ. މީގެ އިތުރުން، ކައުންސިލްތަކަށް އެ ރަށަކުން ނަގާ ޓެކުހުގެ 10 ޕަސަންޓު ލިބޭނެ ނިޒާމެއްވެސް ވަނީ އިއުލާންކޮށްފައެވެ. މި ފިޔަވަޅުތަކަކީ ކައުންސިލްތައް މާލީ ގޮތުން ބާރުވެރިކުރުމަށް އަޅާފައިވާ ފިޔަވަޅުތަކެކެވެ.

މިނިސްޓަރު ޝަރީފް އިތުރަށް ވިދާޅުވި ގޮތުގައި، ކައުންސިލްތަކަށް ދިމާވެފައިވާ ޖާގައިގެ މައްސަލަ ހައްލުކުރުމަށްޓަކައި 50 ކައުންސިލް އިދާރާ އެޅުމަށް ތައްޔާރުވަމުންދާ ކަމަށާއި، 55 ކައުންސިލް އެޅުމަށް ހުށަހަޅާފައިވާ ޕްރޮޕޯސަލް ރިވިއުކޮށް އިކޮނޮމިކް ކައުންސިލަށް ހުށަހަޅާފައިވާ ކަމަށެވެ. މި މަސައްކަތްތަކަކީ ކައުންސިލްތައް އުމްރާނީ ގޮތުން ތަރައްގީކުރުމަށް ކުރެވޭ މަސައްކަތްތަކެކެވެ.