ރައީސް އޮފީހުން ހާމަކުރި މައުލޫމާތުގައިވާ ގޮތުން، މި ދަތުރުފުޅުގެ ޖުމުލަ ހަރަދަކީ 2.4 މިލިއަން ރުފިޔާއެވެ.
ކުރީގެ ރައީސް އިބްރާހިމް މުހައްމަދު ސޯލިހް 2021 ވަނަ އަހަރު އދ. ގެ އާންމު މަޖިލީހުގެ އަހަރީ ބައްދަލުވުމުގައި ބައިވެރިވެވަޑައިގަތުމަށް ކުރެއްވި ދަތުރުފުޅަށް 5.3 މިލިއަން ރުފިޔާއަށް ވުރެ ގިނަ އަދަދެއް ހަރަދުވެފައިވެއެވެ. އަދި 2019 ވަނަ އަހަރު ކުރެއްވި އެފަދަ ދަތުރުފުޅަކަށް 4.1 މިލިއަން ރުފިޔާއަށް ވުރެ ގިނަ އަދަދެއް ހަރަދުވެފައިވާކަން ފާހަގަކުރެވެއެވެ.
ރައީސް މުއިއްޒުގެ ދަތުރުފުޅުގެ ހަރަދު މިހާ ކުޑަވެފައިވަނީ އެމަނިކުފާނު ދަތުރުފުޅު ކުރެއްވީ ބިޒްނަސް ކްލާހުގައި ކަމަށްވާތީއެވެ. ކުރީގެ ރައީސުން މިފަދަ ދަތުރުފުޅުތައް އާންމުކޮށް ކުރައްވަނީ ފަސްޓް ކްލާހުގައެވެ. ރައީސް އޮފީހުން ބުނީ މިއީ މީގެ ކުރީ ފަހަރުތަކާ އަޅާބަލާއިރު ވަރަށް ބޮޑުތަނުން ހަރަދުކުޑަ، އަދި ވަރަށް ގިނަ ކާމިޔާބީތަކެއް ރާއްޖެއަށް ލިބުނު ދަތުރުފުޅެއް ކަމަށެވެ.
މި ދަތުރުފުޅުގައި ރައީސް މުއިއްޒު ވަނީ އދ. ގެ އާންމު މަޖިލީހުގައި ތަގުރީރު ކުރެއްވުމުގެ އިތުރުން، އދ. ގެ ސަލާމަތީ މަޖިލީހުގައި ވެސް ވާހަކަފުޅު ދައްކަވާފައެވެ. މިއީ ސަލާމަތީ މަޖިލީހުގައި ދިވެހި ރައީސަކު ވާހަކަދެއްކެވި ފުރަތަމަ ފަހަރެވެ. އަދި އެމަނިކުފާނުގެ ތަގުރީރަށް ދުނިޔޭގެ މީޑިއާތަކުގެ ބޮޑު ސަމާލުކަމެއް ވެސް ވަނީ ލިބިފައެވެ.
