މި ބިލަކީ މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލެވެ.
މަޖިލީހުގައި މިއަދު ނެގުނު ވޯޓުގައި، ބިލު ބަލައިގަތުމަށް 52 މެންބަރުން ތާއީދުކުރިއެވެ. އެހެންނަމަވެސް 7 މެންބަރުން ވަނީ ބިލު ބަލައިނުގަތުމަށް ވޯޓުދީފައެވެ. މި ބިލަކީ ޓެކްސްއާ ގުޅުންހުރި ބިލަކަށް ވުމާއެކު، މުޅި މަޖިލީހުގެ ކޮމިޓީން މި ބިލު ދިރާސާކުރުމަށް ވަނީ ނިންމާފައެވެ.
ބިލުގައިވާ ގޮތުން، މިހާރު ނަގަމުންދާ 16 ޕަސަންޓުގެ ޓީޖީއެސްޓީ އަންނަ އަހަރުގެ މެއި މަހުގެ ނިޔަލަށް ދެމިއޮންނާނެއެވެ. ނަމަވެސް ޖޫން މަހުން ފެށިގެން ޓީޖީއެސްޓީ 17 ޕަސަންޓަށް ބޮޑުކުރެވޭނެއެވެ. މި ބަދަލާ ގުޅިގެން ދައުލަތަށް އިތުރު 200 މިލިއަން ރުފިޔާ ލިބޭނެކަމަށް ލަފާކުރެވެއެވެ.
މި ބިލާ ގުޅޭގޮތުން މަޖިލީހުގައި ބަހުސްކުރެވުނުއިރު، ސަރުކާރަށް ނިސްބަތްވާ ގިނަ މެންބަރުން ވަނީ ޓެކްސް ބޮޑުކުރުމަކީ މުހިންމު ފިޔަވަޅެއްކަމަށް ބުނެފައެވެ. އެހެންނަމަވެސް އިދިކޮޅު މެންބަރުން ވަނީ، ކުރިން ސަރުކާރުން ޓެކްސް ބޮޑުނުކުރާނެކަމަށް ބުނެފައިވާތީ، އެކަމާމެދު ސުވާލު އުފައްދާފައެވެ. މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ، މާދަމާގެ ޖަލްސާގެ އެޖެންޑާގެ މަސައްކަތް ނިމިއްޖެނަމަ، މާދަމާ މި ބިލާ ގުޅޭ ކޮމިޓީ ބޭއްވުމަށް ރޭވިފައިވާ ކަމަށެވެ.
