މި ލޯނަކީ ހަބީބް ބޭންކުން ނަގާ ލޯނެކެވެ.
މާލިއްޔަތު ކޮމިޓީގައި މިއަދު ހާމަކުރި ގޮތުގައި، މި ލޯނު ނަގަނީ ތިލަފުށީގެ ދެވަނަ ފިޔަވަހީގެ މަޝްރޫއު ކުރިއަށް ގެންދިއުމަށެވެ. އެޗްޑީސީން ބުނީ މި ފައިސާ ބޭނުންކުރާނީ އެޑްވާންސް ޕޭމަންޓުގެ ގޮތުގައި ބޭނުންވާ 25 ޕަސަންޓު ފައިނޭންސް ހޯދުމަށް ކަމަށެވެ.
މި މަޝްރޫއުގެ ދަށުން 150 ހެކްޓަރުގެ ބިމެއް ހިއްކުމަށްފަހު އެ ސަރަހައްދުގެ ޝޯ ޕްރޮޓެކްޝަން މަސައްކަތް ކުރުމަށް ވަނީ ރޭވިފައެވެ. އެ ސަރަހައްދު ހަ ޒޯނަކަށް ބަހާލައިގެން އިންޑަސްޓްރިއަލް މަސައްކަތްތައް ކުރުމަށް ވެސް ވަނީ ޕްލޭން ކުރެވިފައެވެ. މީގެ އިތުރުން، އެ ސަރަހައްދުގައި ލިކުއިފައިޑް ނެޗުރަލް ގޭސް ޕްލާންޓެއް ގާއިމް ކުރުމަށް ވެސް ވަނީ ރޭވިފައެވެ.
މިދިޔަ އަހަރު ވެސް އެޗްޑީސީއިން ވަނީ ސަރުކާރުގެ ގެރެންޓީއާއެކު މޯލްޑިވްސް އިސްލާމިކް ބޭންކުން ދެ ފަހަރެއްގެ މަތިން 200 މިލިއަން ރުފިޔާގެ ލޯނު ނަގާފައެވެ. މި އަހަރުގެ މިހާތަނަށް ސަރުކާރުން ޖުމުލަ ތިން ބިލިއަން ރުފިޔާގެ ލޯނު ނަގާފައިވާ ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައެވެ.
