ދައުލަތުގެ މީޑިއާ މެދުވެރިކުރައްވައި ރައްޔިތުންނާއި ވާހަކަދައްކަވަމުން އަސަދުﷲ ވިދާޅުވީ، ޓެކްސް ބޮޑުކުރުމުން ޓޫރިސްޓުންގެ އަދަދު މަދުވާނެ ކަމަށް އިދިކޮޅު ފަރާތްތަކުން ދައްކާ ވާހަކަތަކަކީ ދޮގު ވާހަކަތަކެއް ކަމަށެވެ.
އަސަދުﷲ ވިދާޅުވީ މުދަލާއި ހިދުމަތުގެ ގާނޫނަށާއި ޓެކްސް ނެގުމުގެ ގާނޫނަށް ގެންނަ އިސްލާހާއެކު 900 މިލިއަން ރުފިޔާ ދައުލަތަށް ލިބޭނެ ކަމަށް އަންދާޒާކުރެވޭ ކަމަށެވެ. އަދި ޓޫރިޒަމް ގާނޫނަށް ގެންނަ އިސްލާހާއެކު 200 މިލިއަން ރުފިޔާ ލިބޭނެ ކަމަށާއި، އެއާޕޯޓް ޓެކްސް ބިލާއެކު 1.5 ބިލިއަން ރުފިޔާގެ އާމްދަނީއެއް ދައުލަތަށް ލިބޭނެ ކަމަށް އަސަދުﷲ ވިދާޅުވިއެވެ.
އޭނާ ވިދާޅުވީ ދުނިޔޭގެ އިގްތިސާދަށް އަންނަ ބަދަލުތަކާއި މީހުންގެ ދަތުރުފަތުރުގެ އާދަތަކަށް ބަލައި ދިރާސާކޮށްފައި ކަމަށެވެ. އަދި މިއީ ހަމައެކަނި ކަމެއް ކޮށްލުމުގެ ގޮތުން ގެނެވޭ ބަދަލުތަކެއް ނޫން ކަމަށްވެސް އަސަދުﷲ ވިދާޅުވިއެވެ.
ސަރުކާރުން މިހާރު ވަނީ ގްރީން ޓެކްސް ދެ ގުނަ ކުރުމަށާއި، އެއާޕޯޓް ޓެކްސް ބޮޑުކުރުމަށް ރައްޔިތުންގެ މަޖިލީހަށް ހުށަހަޅާފައެވެ. މީގެ އިތުރުން ޓީޖީއެސްޓީ 16 ޕަސަންޓުން 17 ޕަސަންޓަށް ބޮޑުކުރުމަށްވެސް ވަނީ ހުށަހަޅާފައެވެ. މި ހުށަހެޅުންތައް މިހާރު ވަނީ މަޖިލީހުގެ ކޮމިޓީއަށް ފޮނުވާފައެވެ.
