އދ ގެ އިންސާނީ ހައްގުތަކާބެހޭ މަޖިލިސް ގެ 57 ވަނަ ސެޝަންގެ ބައްދަލުވުން ނިންމާލީ މިއަދު ކަަމަށްވާއިރު ބައްދަލުވުމުގައި ޖުމްލަ 37 ގަރާރެއް ވަނީ ފާސްކޮށްފައެވެ.
37 ގަރާރުގެ ތެރެއިން ރާއްޖެއިން 16 ގަރާރެއް ކޯ ސްޕޮންސާކޮށްފައިވާއިރު އެ ގަރާރުތަކުގެ ތެރޭގައި ހިމެނެނީ :
- އިންޓަނެޓުގައި އިންސާނީ ހައްޤުތައް ކުރިއެރުވުމާއި ހިމާޔަތްކުރުމާބެހޭ ގަރާރު
- މުޖުތަމައުގައި ނުކުޅެދުންތެރިކަމާއި ނިކަމެތިކަން ތަހައްމަލުކުރާ ފަރާތްތަކާއި އުމުރުން ދުވަސްވީ ފަރާތްތައް ހިމެނޭގޮތަށް އިންސާނީ ހައްގުތައް ފުރިހަމައަށް ހޯދުމަށްޓަކައި އެކަމަށް މަގުފަހިކުރުމާބެހޭ ގަރާރު
- ބަޔޯޑައިވާސިޓީ އާއި އިންސާނީ ހައްގުތަކާބެހޭ ގަރާރު
- އިންސާނީ ހައްގުތައް ކުރިއެރުވުމާއި ހިމާޔަތްކުރުމުގައި ހެޔޮވެރިކަމުގެ ދައުރާބެހޭ ގަރާރު
- ލޯކަލް ގަވަމަންޓާއި އިންސާނީ ހައްގުތަކާބެހޭ ގަރާރު
- ރައްކާތެރި ބޯފެނާއި ނަރުދަމާގެ ނިޒާމާ ގުޅޭ ހައްގާބެހޭ ގަރާރު
މި އަހަރުގެ ސެޝަންގައި ރާއްޖެއިން 50 ޖޮއިންޓް ސްޓޭޓްމަންޓެއް ކޯސްޕޮންސާ ކޮށްފައިވާކަމަށްވެސް ފޮރިން މިނިސްތްރީން ފާހަގަކުރެއެވެ. އެގޮތުން، އޯގަނައިޒޭޝަން ފ\ޮ އިސްލާމިކް ކޯޕަރޭޝަން (އޯއައިސީ. އާއި ނޮން އެލައިންޑް މޫވްމަންޓް (ނާމް) ގެ ބަޔާންތައް ހިމެނެއެވެ. އަދި، ސެކްރެޓަރީ ޖެނެރަލްގެ ރިޕޯޓަށް ބަހުސްކުރުމުގެ ގޮތުން ބޭއްވި އިންޓަރެކްޓިވް ޑައިލޮގްގައި، ތަރައްގީވަމުން އަންނަ ކުދިޖަޒީރާ ގައުމުތަކުގެ ފަރާތުން ރާއްޖެއިން ވަނީ މޫސުމަށް އަންނަ ބަދަލުތަކާ ގުޅޭ ބަޔާނެއް ހުށަހަޅައިދީފައި ކަމަށްވެސް ފޮރިން މިނިސްޓްރީން ފާހަގަކުރެއެވެ.
އިންސާފުވެރި އަދި ހަމަހަމަ މުސްތަގުބަލެއް ހުރިހާ އެންމެންނަށް ފޯރުކޮށްދިނުމަށްޓަކައި ތަރައްގީވަމުން އަންނަ ކުދި ޖަޒީރާ ގައުމުތައް އެކީގައި އަދި ހުރިހާ ގައުމަކަށްވެސް އެއްބާރުލުންދީގެން މަސައްކަތް ކުރާނެކަމުގެ ޔަގީންކަން ދީފައިވާކަން ފޮރިން މިނިސްޓްރީން ފާހަގަކުރެއެވެ.
އޭގެ އިތުރުން، ފަލަސްތީނުގައި އިސްރާއީލުން ކުރިއަށްގެންދާ ހަނގުރާމައާއި ހަމަނުޖެހުން ހުއްޓާލުމަށާއި، ފަލަސްތީނަށް އިސްރާއީލުން ކުރިމަތި ކުރަމުންދާ ލާއިންސާނީ ހަމާލާތަކަށް ޖަވާބުދާރީކުރުވުމާއި، އެގައުމުގެ ސަލާމަތާއި ރައްކާތެރިކަމަށް ގޮވާލާ ޖޮއިންޓް ސްޓޭޓްމަންޓްތަކެއް ކޯ-ސްޕޮންސަރކޮށް، ފަލަސްތީނުގެ ޙައްގުގައި ވަކާލާތުކުރުމުގައި ރާއްޖެއިން ދެމިއޮންނާނެކަމުގެ ޔަގިންކަން ދީފައިވެއެވެ. މީގެ އިތުރުން އދގެ ރިލީފް އެންޑް ވޯކާސް އެޖެންސީ ފޯ ޕަލެސްޓައިން ރެފިއުޖީސް އިން ދަ ނިއާ އީސްޓް (އަންރުވާ) އުވާލަން ގޮވާލައި އެ އިދާރާއިން ކުރާ މަސައްކަތް ކުށެއްގެގޮތުގައި ކަނޑައެޅުމަށް އިސްރާއީލުން ކުރަމުންގެންދާ މަސައްކަތް ހަރުކަށި އިބާރާތުން ކުށްވެރިކުރާ ޖޮއިންޓް ސްޓޭޓްމަންޓެއްވެސް ރާއްޖެއިން ވަނީ ކޯ-ސްޕޮންސަރކޮށްފައެވެ.
އިންސާނީ ހައްގުތަކާ ބެހޭ މަޖިލީހުގެ 57 ވަނަ ސެޝަންގެ ބައްދަލުވުމުގައި ބައިވެރިވި ރާއްޖޭގެ ވަފުދުގައި އިސްކޮށް ހުންނެވީ ޖެނީވާގައި ހުންނަ އދ. ގެ އޮފީހާއި އެހެނިހެން ބައިނަލްއަގުވާމީ ޖަމިއްޔާތަކަށް ކަނޑައަޅާފައި ހުންނަ ރާއްޖޭގެ ދާއިމީ މަންދޫބު ޑރ. ސަލްމާ ރަޝީދު އެވެ. މީގެ އިތުރުން ޖެނީވާގައި ހުންނަ ރާއްޖޭގެ އދ ގެ ދާއިމީ މިޝަންގެ ކައުންސެލާ އާދަމް ހާމިދު، ކައުންސެލާ އާމިނަތު ޝިފާޔާ އިބްރާހީމް، ސެކަންޑް ސެކްރެޓަރީ މަރިޔަމް ފާތިކާ ފަޔާޒް، ތާޑް ސެކްރެޓަރީ އާމިނަތު ޝަދާ އިބްރާހިމް އަދި އެޓާޝޭ މުހައްމަދު ރާއިދު ސައީދު ވަފުދުގައި ހިމެނިވަޑައިގަންނަވައެވެ.
