ވިލިމާލޭގައި އިމާރާތްކުރާ 100 އެނދުގެ ޓާޝަރީ ހޮސްޕިޓަލް އަޅާދެނީ ޗައިނާ ސަރުކާރުގެ ހިލޭއެހީގައެވެ.
މި ހޮސްޕިޓަލްގެ ފީސިބިލިޓީ ސްޓަޑީ ހަދަން ޗައިނާ ސަރުކާރާ އެކު ލެޓާ އޮފް އެކްސްޗޭންޖުގައި ސޮއިކުރީ މި އަހަރުގެ މޭމަހުގެ 22 ގައެވެ.
އެ ދިރާސާގެ ހޯދުންތަކާ ގުޅޭ މެމޮރެންޑަމް އޮފް ފީސިބިލިޓީ ފައިންޑިންގްސްގައި ދެ ގައުމުން މިއަދު ވަނީ ސޮއިކޮށްފައެވެ. ދިވެހި ސަރުކާރުގެ ފަރާތުން މެމޯގައި ސޮއިކުރެއްވީ ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބެވެ. ޗައިނާގެ ސަރުކާރުގެ ފަރާތުން ސޮއިކުރެއްވީ ރާއްޖޭގައި ހުންނަވާ ޗައިނާގެ ސަފީރު ވަންގް ލިޒިން އެވެ.
މި އެއްބަސްވުމާއި އެކު ހޮސްޕިޓަލް އިމާރާތުގެ ޑިޒައިނާއި އިމާރާތް ހެދުމުގެ މަސައްކަތް ކުރާނެ ބަޔަކާއި ހަވާލުކުރުމުގެ މަސައްކަތް ދެން ފެށިގެންދާނެކަމަށް ކޮންސްޓްރަކްޝަން މިނިސްޓްރީން ބުނެއެވެ.
މި މަޝްރޫއުގެ ފީސިބިލިޓީ ސްޓަޑީ ތައްޔާރު ކުރުމަށް ލެޓާ އޮފް އެކްސްޗޭންޖުގައި ސޮއިކޮށްފައި ވަނީ ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ރަސްމީ ދަތުރުފުޅުގައި ޗައިނާ ސަރުކާރާ އެކު ދިވެހި ސަރުކާރުން ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ތަރައްގީ ކުރުމަށް މި އަހަރުގެ ޖެނުއަރީ މަހުގެ 10 ވަނަ ދުވަހު ސޮއިކުރެވުނު ފަހުމުނާމާ އާ ގުޅިގެން ކަމަށެވެ.
