ވެރިކަން ކުރާ ކޯލިޝަނުގައި ހިމެނޭ ޕީޕީއެމްގެ ސެނެޓަރުންގެ ކުއްލި ބައްދަލުވުމެއް ބާއްވަނީ ކީއްވެގެން ކަމެއް އެޕާޓީއަކުން ނުބުނެ އެވެ.
އެހެން ނަމަވެސް ބައްދަލުވުން މި ބާއްވަނީ އެ ޕާޓީ އުވާލުމުގެ މަސައްކަތް ކުރަމުން އަންނަކަމަށް ބުނެ އަޑު ފެތުރުފައިވަނިކޮށެވެ. އަދި މިއަދުގެ އެޖެންޑާގައި ހިމަނާފައިވަނީ ޕާޓީ އުވާލުމުގެ މައްސަލަ ކަމަށް ސެނެޓުގެ ބައެެއް މެމްބަރުން ވަނީ ވިދާޅުވެފަ އެވެ. ޕީޕީއެމާއި ޕީއެންސީ ހިންގަމުން އައި ޖޮއިންޓް އެއް ޕާޓިއެއްގެ ގޮތުގައެވެ. އަދި ރިޔާސީ އިންތިހާބުގައިވެސް ވާދަ ކުރީ ކޯލިޝަނެއްގެ ގޮތުގައެވެ.
ޕީޕީއެމް އަކީ ކުރިން ޑީއާރުޕީގެ އެތެރޭގައި އުފެދުނު ހިޔާލު ތަފާތުވުންތަކުގެ ތެރެއިން، ކުރީގެ ރައީސް މައުމޫން އަބްދުއް ގައްޔޫމާއި އެ މަނިކުފާނުގެ ސަޕޯޓަރުން ޑީއާރުޕީން ވަކިވެގެން އުފެއްދި ޕާޓީ އެވެ. ޕީޕީއެމް ރަޖިސްޓްރީ ކުރީ 27 އޮކްޓޯބަރު 2011ގަ އެވެ. އެހެން ނަމަވެސް ފަހުން ރައީސް ޔާމީންގެ ވެރިކަމުގައި އެމަނިކުފާނުގެ ބޭބޭފުޅު ރައީސް މައުމޫނާ ދެ ބޭފުޅުންގެ ދެމެދު އުފެދުނު ހިޔާލު ތަފާތުވުންތަކުގައި މައުމޫން ވަނީ އެޕާޓީން ވަކިކޮށްފަ އެވެ. އޭގެ ފަހުން މިދިޔަ ރިޔާސީ އިންތިހާބާ ހަމައަށް އެޕާޓީގެ ލީޑަރެއްގެ ގޮތުގައި ހުންނެވީ ރައީސް ޔާމީންނެވެ.
