އިކޮނޮމޮކް މިނިސްޓްރީން ބުނީ ބޭންކުގެ ހިދުމަތް ފެށުމަށް ބޭނުންވާ ފަންނީ މުވައްޒަފުން ނެގުމުގެ މަސައްކަތް މިހާރު ވަނީ ފަށާފައި ކަމަށެވެ. އަދި ސަރުކާރުގެ އަމާޒަކީ މިއަހަރު ނިމުމުގެ ކުރިން ބޭންކުގެ ހިދުމަތްތައް ފެށުން ކަމަށް ވެސް ބުންޏެވެ.
ޑިވެލޮޕްމަންޓް ބޭންކަކީ ސައްތައިން ސައްތަ ދިވެހި ސަރުކާރުގެ ހިއްސާ އޮންނަ ބޭންކެކެވެ. މި ބޭންކުން މަސައްކަތް ކުރާނެ މައިގަނޑު ފަސް ދާއިރާއެއް ވަނީ ކަނޑައަޅާފައެވެ. އޭގެ ތެރޭގައި ހަކުރާއި ކާބޯތަކެތީގެ ޔަގީންކަން އަދި އަގުތައް ހިފެހެއްޓުމާއި، ވަޒަންވެރިކަމާއި ބޯހިޔާވަހިކަން، ތިމާވެށި ހިމާޔަތްކުރުން، ޓޫރިޒަމް އަދި ވައިގެ ދަތުރުފަތުރުގެ ހިދުމަތްތައް، އަދި ކަނޑުގެ މަންފާއާއި ކަނޑާ ގުޅިފައިވާ އިގުތިސާދީ ހަރަކާތްތަކުގެ ދާއިރާ ހިމެނެއެވެ.
ސަރުކާރުން ބުނާ ގޮތުގައި މި ބޭންކު ވެގެންދާނީ ރާއްޖޭގައި ހިދުމަތްދޭ އެހެނިހެން މާލީ މުއައްސަސާތަކާއި ބައިނަލްއަގުވާމީ މާލީ މުއައްސަސާތަކާ އަދި އިންވެސްޓަރުންނާ ގުޅިގެން ތަރައްގީގެ މަޝްރޫއުތަކަށް ބޭނުންވާ ފައިސާ ދިވެހިރާއްޖެއަށް ފަހިކުރުމުގެ ބައިވެރިއަކަށެވެ. އަދި ބޭންކުން ފައިސާ ދޫކުރާނީ ހަމައެކަނި ދަރަނީގެ ގޮތުގައި ނޫން ކަމަށާއި، އިކުއިޓީ ފައިނޭންސް، ފަންޑު ސިންޑިކޭޝަން، އަދި ރިސްކް އިންޝުއަރެންސް ވެސް ހިމެނޭނެ ކަމަށް ސަރުކާރުން ބުނެފައިވެއެވެ.
