މި ފަސް އަހަރު ރާއްޖޭގައި ފަސް މިލިއަން ގަސް އިންދުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. 5 މިލިއަން ގަސް ޕްރޮގްރާމް ރަސްމީކޮށް އިފްތިތާހުކުރީ މިއަހަރުގެ ތިމާވެށީގެ ދުވަހުއެވެ.
މި ޕްރޮގްރާމުގައި ބައިވެރިވުމުގެ ގޮތުން، އެމްޕީއެލުން ވަނީ ތިލަފުށީގައި ގަސް އިންދުމުގެ ހަރަަކާތެއް ކުރިޔަށް ގެންގޮސްފައެވެ. އެމްޕީއެލުންވަނީ މި ޕްރޮގްރާމްގައި ބައިވެރިވެ ފަސް އަހަރުގެ ތެރޭގައި އެއް މިލިއަން ގަސްއިންދުގެ ވައުދުގައި ސޮއިކޮށްފައެވެ.
މި ވައުދުގައި އެމްޕީއެލްގެ ފަރާތުން ސޮއިކުރެއްވީ އެކުންފުނީގެ ސީއީއޯ މުހައްމަދު ވަޖީހް އިބްރާހީމް އެވެ. މި ވައުދާއި ހަވާލުވެޑައިގަތީ ތިމާވެއްޓާއި ބެހޭ ވަޒީރު ތާރިގު އިބްރާހީމްއެވެ.
އެމްޕީއެލުން 5 މިލިއަން ގަސް އިންދުމުގެ ޕްލެޖްގައި ސޮއިކުރަނީ
ފަސް މިލިއަން ގަސް އިންދުމުގެ ޕްރޮގްރާމްގެ ދަށުން ރިސޯޓްތަކުގަ އާއި ރަށްތަކުގައި ވެސް ގަސް އިންދުމުގެ މަޝްރޫއު ފެށިގެން ދާނެ އެވެ. ލޮނުޒިޔާރަތް ޕާކުގައި ވަނީ ރާއްޖޭގައި ނެތެމުންދާ 22 ވައްތަރެއްގެ ގަސް އިންދާފަ އެވެ. އެގޮތުން ރައީސް ޑރ. މުއިއްޒު އިންދަވާފައި ވަނީ ދިވެހި ބޭސް ފަރުވާއަށް ބޭނުން ކުރާ ބާވަތެއް ކަމަށްވާ "ކާބުލި އަރޮޅި" ގަހެއް ކަމަށްވާއިރު ރައީސްގެ އަނބިކަނބަލުން އިންދެވީ "ކާމިނީ ޕޫލް" ގަހެކެވެ.
ގަސް އިންދުމުގެ ބިޔަ ޕްރޮގްރާމްގައި އިސްކަން ދޭނީ ރާއްޖެއިން ނެތެމުންދާ ބާވަތްތަކުގެ ގަސް އިންދާ އާލާކުރުމަށެވެ. އެގޮތުން ރާއްޖެއިން ނެތެމުންދާ ކަމަށް 90 ބާވަތެއްގެ ގަސް ލިސްޓުކޮށް، ޕްރޮގްރާމްގައި އެ ބާވަތުގެ ގަސްތައް އިންދާނެ އެވެ.
އޭގެ ތެރޭގައި ހިރުނދާއި ދިއްގާގެ އިތުރުން ރުއް ހިމެނެ އެވެ.
