ސީރިއާގައި ކުރިއަށްދާ ދާހިލީ ހަނގުރާމައިގައި ބައިވެރިވުމަށް ރާއްޖޭން ދިޔަ މީހުންގެ ތެރެއިން ފަސް އާއިލާއަކަށް ނިސްބަތްވާ 21 މީހަކު އެހީއަށް އެދުމުން ރާއްޖެ ގެނައީ މިއަހަރުގެ ޖެނުއަރީ 16ގައެވެ. އެއީ ހަ މީހަކާއި 15 ކުޑަ ކުއްޖެކެވެ.
ރާއްޖެ ގެނައުމަށްފަހު މި އެންމެންވެސް ގެންދިޔައީ ހިންމަފުށީގައި ހުންނަ "ނެޝަނަލް އިންޓަގްރޭޝަން ސެންޓަރު" ގެ ބެލުމުގެ ދަށަށެވެ،
ހޯމް މިނިސްޓްރީން ބުނީ އޭގެ ތެރެއިން ޕްރޮގްރާމް ފުރިހަމަކުރި ދެ ކުއްޖަކު އާއިލާއާ ހަވާލުކޮށްފައިވާކަމަށެވެ. ބާކީ ތިބި އެންމެ އަދިވެސް ތިބީ ސެންޓަރުގެ ބެލުމުގެ ދަށުގައިކަމަށް ހޯމް މިނިސްޓްރީން ބުނެއެވެ. އަފި މީ މީހުން އިތުރު ހަ މަސްދުވަހު އެ ސެންޓަރުގައި ބޭތިއްބުމަށް ނިންމާފައިވާކަމަށްވެސް ހޯމް މިނިސްޓްރީން ބުނެއެވެ.
ސީރިއާގައި ކުރިއަށްދާ ދާހިލީ ހަނގުރާމައިގައި ބައިވެރިވުމަށް ރާއްޖޭން ދިޔަ މީހުންގެ 21 މީހަކު ގެނަައުމަށް ގާތްގަނޑަކަށް 1.8 މިލިއަން ރުފިޔާ ހޭދަވި ކަމަށް ހޯމްލޭންޑް ސެކިއުރިޓީ މިނިސްޓްރީން ވަނީ ބުނެފައެވެ. ހަނގުރާމައަށް ގޮސް އަންނަ ހުރިހާ މީހުން ވެސް އަނބުރާ މުޖުތަމައުއަށް ނެރެން ކުރާ ހަރަދުތައް ވެސް ކުރާނީ ސަރުކާރުން ކަމަށް ހޯމް މިނިސްޓްރީން ވަނީ ބުނެފައެވެ.
