މި ކަމަށްޓަކައި މިއަދު މަޖިލީހުގެ ޖަލްސާއެއް ބޭއްވުމަށް ވަނީ ތާވަލުކޮށްފަ އެވެ.
މި އަހަރަށް މަޖިލީހުން ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ. ނަމަވެސް ސެޕްޓެންބަރުގެ ނިޔަލަށް މި ބަޖެޓުން ހަރަދުވެފައިވަނީ 37 ބިލިއަން ރުފިޔާ އެވެ. އެހެންކަމުން އަހަރުގެ ބާކީ އޮތް މުއްދަތަށް އިތުރު ފައިސާ ބޭނުންވާތީ ސަޕްލިމެންޓަރީ ބަޖެޓެއް ހުށަހެޅުމަށް ސަރުކާރުން ވަނީ ނިންމާފައެވެ.
ސަޕްލިމެންޓަރީ ބަޖެޓު ހުށަހަޅާއިރު، އިތުރަށް އާމްދަނީ ހޯދާނެ ގޮތްތަކާއި އާމްދަނީން ހަމަނުޖެއްސޭ ހަރަދުތައް ހަމަޖެއްސުމަށް ފައިސާ ހޯދާނެ ގޮތްތަކުގެ ތަފުސީލު މަޖިލީހަށް ހުށަހަޅަންޖެހޭނެއެވެ. މިއީ ގާނޫނުއަސާސީއާއި މާލިއްޔަތު ގާނޫނުގައި ބަޔާންކުރާ ގޮތުގެ މަތިން ކުރަންޖެހޭ ކަމެކެވެ.
ފާއިތުވި ދެ އަހަރު ސަޕްލިމެންޓަރީ ބަޖެޓު ހުށަހަޅާފައިވަނީ ޖެހިގެން އަންނަ އަހަރުގެ ބަޖެޓާ އެކުގަ އެވެ. ނަމަވެސް މި އަހަރު ސަޕްލިމެންޓަރީ ބަޖެޓު ހުށަހަޅަނީ އަންނަ އަހަރުގެ ބަޖެޓު ހުށަހެޅުމުގެ ކުރިން، ކުރީގެ އާދަކާދައިގެ މަތިންނެވެ.
