މިނިސްޓަރު މި ވާހަކަ ވިދާޅުވީ ރައްޔިތުންގެ މަޖިލީހަށް 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް ހުށަހަޅަމުންނެވެ.
މިނިސްޓަރު ޒަމީރު ވިދާޅުވި ގޮތުގައި ޕީއެސްއައިޕީ ބަޖެޓު ކުރިއިރު ރިއަލިސްޓިކް ނޫން ގޮތަކަށް ކުދި އަދަދުތައް މަޝްރޫއުތަކަށް ޖަހާފައި ހުރުމުގެ ސަބަބުން، އެ މަޝްރޫއުތަކުގެ ހަގީގީ ހަރަދުތައް ހަމަޖެއްސުމަށް 2 ބިލިއަން ރުފިޔާ މި ސަޕްލިމެންޓަރީ ބަޖެޓުގައި ހިމަނަން ޖެހިފައިވެއެވެ.
މީގެ އިތުރުން، މިދިޔަ އަހަރުގެ މާލީ ހިސާބުތައް ރިކޯޑުކުރުމުގައި ވެސް ބޮޑެތި މައްސަލަތަކެއް ހުރި ކަމަށް މިނިސްޓަރު ތުހުމަތުކުރެއްވިއެވެ. އޭގެ ސަބަބުން، މިދިޔަ އަހަރުގެ ހަރަދުތަކަށް މި އަހަރުގެ ބަޖެޓުން ގާތްގަނޑަކަށް 2 ބިލިއަން ރުފިޔާގެ ޖާގައެއް ހޯދަން ޖެހިފައިވާ ކަމަށް މިނިސްޓަރު ކުރިން ވިދާޅުވެފައިވެއެވެ.
ފިނޭންސް މިނިސްޓްރީން ބުނެފައިވާ ގޮތުގައި މި ސަޕްލިމެންޓަރީ ބަޖެޓާއެކު މި އަހަރުގެ ޖުމުލަ ބަޖެޓު 55 ބިލިއަން ރުފިޔާއަށް އަރާނެއެވެ. އަދި މި އިތުރު ބަޖެޓުގައި ރިކަރަންޓު ހަރަދުގެ ގޮތުގައި 1.5 ބިލިއަން ރުފިޔާ އަދި ކެޕިޓަލް ހަރަދުގެ ގޮތުގައި 3.6 ބިލިއަން ރުފިޔާ ހިމެނިފައިވާ ކަމަށް މިނިސްޓްރީން މައުލޫމާތު ދީފައިވެއެވެ.
