މާލީ މިނިސްޓްރީން ބުނީ މި އަހަރުގެ ޖުމުލަ އާމްދަނީއާއި ހިލޭ އެހީ 34.2 ބިލިއަން ރުފިޔާއަށް އަރާނެ ކަމަށެވެ. މިއީ ކުރިން އަންދާޒާކުރި އަދަދަށް ވުރެ 640.1 މިލިއަން ރުފިޔާ އިތުރު އަދަދެކެވެ.
މާލީ މިނިސްޓަރު މޫސާ ޒަމީރު މަޖިލީހަށް ހުށަހެޅުއްވި ސަޕްލިމެންޓަރީ ބަޖެޓުގައި މި އަހަރު އާމްދަނީ އިތުރުވާނެ ކަމަށް ލަފާކޮށްފައިވެ އެވެ. އޭގެ ތެރޭގައި ޓެކުހުގެ ގޮތުގައި އިތުރު 61.6 މިލިއަން ރުފިޔާ ލިބޭނެ ކަމަށް ބެލެވެ އެވެ. އަދި އެހެނިހެން އާމްދަނީގެ ގޮތުގައި 379.2 މިލިއަން ރުފިޔާ އާއި ހިލޭ އެހީގެ ގޮތުގައި 199.3 މިލިއަން ރުފިޔާ ލިބޭނެ ކަމަށް އަންދާޒާކޮށްފައިވެ އެވެ.
މިދިޔަ މަހާ ހަމައަށް އާމްދަނީއާއި ހިލޭ އެހީގެ ގޮތުގައި ލިބިފައިވަނީ 26.9 ބިލިއަން ރުފިޔާ އެވެ. އަދި މި އަހަރުގެ ބަޖެޓު ޑެފިސިޓު 18 ބިލިއަން ރުފިޔާއަށް އަރާނެ ކަމަށް ބެލެވެ އެވެ. އެއީ އުފެއްދުންތެރިކަމުގެ ނިސްބަތުން 16 ޕަސަންޓު އެވެ. އަހަރު ނިމޭއިރު ދަރަނި ހުންނާނީ އުފެއްދުންތެރިކަމުގެ ނިސްބަތުން 118 ޕަސަންޓުގައި ކަމަށް ވަނީ ލަފާކޮށްފަ އެވެ.
މާލީ މިނިސްޓްރީން ބުނީ ސަޕްލިމެންޓަރީ ބަޖެޓެއް މަޖިލީހަށް ހުށަހެޅީ މި އަހަރަށް ކަނޑައެޅި ބަޖެޓު ހުސްވެގެން ނޫން ކަމަށެވެ. މިދިޔަ މަހުގެ ނިޔަލަށް ބަޖެޓުން ޖުމުލަ ހަރަދުވެފައިވަނީ 37.4 ބިލިއަން ރުފިޔާ ކަމަށް އެ މިނިސްޓްރީން މައުލޫމާތު ދީފައިވެ އެވެ.
