އަދި އިތުރު ކުއްޖަކު ކުރިއަށް އޮތް ދެ ހަފުތާގެ ތެރޭގައި ރާއްޖެ އަންނާނެ ކަމަށް މޯލްޑިވްސް ބްލަޑް ސަރވިސަސްއިން ބުނެއެވެ.
މޯލްޑިވްސް ބްލަޑް ސަރވިސަސްގެ އެސޯސިއޭޓް ސްޕެޝަލިސްޓު އިން ޕީޑިއެޓްރިކް ޑރ. އަހުމަދު އުމަރު މީޑިއާތަކާ ވާހަކަ ދައްކަވަމުން ވިދާޅުވީ މިއަހަރު ޖުމުލަ 14 ކުދިން ވަނީ ބޯން މެރޯ ފަރުވާއަށް ފޮނުވާފައި ކަމަށެވެ. އޭގެ ތެރެއިން އެއް ކުއްޖަކު ވަނީ ނިޔާވެފައި ކަމަށާއި، ދެން ތިބި 10 ކުދިން މިހާރު ތިބީ އޮޕަރޭޝަނަށް ފަހު އިތުރު ފަރުވާ ފުރިހަމަކުރަމުން ކަމަށް އެވެ.
ޑރ. އުމަރު ވިދާޅުވީ ފަރުވާ ހޯދަމުންދާ ކުދިން އަދި ގާތްގަނޑަކަށް ތިން މަސް ދުވަހު ރާއްޖެއިން ބޭރުގައި ހޭދަކުރަން ޖެހޭނެ ކަމަށެވެ. އަދި މި ފަރުވާއަށް ކުދިން ފޮނުވަނީ ޒަކާތު ފަންޑުގެ އެހީގައި ކަމަށް ވެސް އޭނާ ވިދާޅުވި އެވެ.
ރާއްޖޭގެ ތެލެސީމިއާ ދަފުތަރުގައި މިހާރު ރަޖިސްޓަރީ ކޮށްފައިވަނީ 959 މީހުން ކަމަށާއި، އޭގެ ތެރެއިން މިވަގުތު ދުނިޔޭގައި ތިބީ 666 މީހުން ކަމަށް ބްލަޑް ސަރވިސަސްއިން ބުނެފައި ވެ އެވެ.
