މި މައުލޫމާތު ހާމަކުރެއްވީ މޯލްޑިވްސް ބްލަޑް ސަރވިސްއިންނެވެ. ސަރުކާރުން ޒަކާތު ފަންޑުގެ އެހީގައި މިހާތަނަށް 14 ކުދިން ބޯންމެރޯ ފަރުވާއަށް ފޮނުވާފައިވެ އެވެ. އޭގެ ތެރެއިން ތިން ކުދިން ވަނީ ފަރުވާ ފުރިހަމަކޮށްފަ އެވެ. އަދި ދެ ކުދިން ވަނީ އެނބުރި ރާއްޖެ އައިސްފަ އެވެ.
ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވި ގޮތުގައި މިހާރުވެސް 40 ކުދިން ބޯންމެރޯ ހެދުމަށް ލިސްޓު ކުރެވިފައިވެ އެވެ. އަދި ކޮންމެ އަހަރަކު ދައުލަތުގެ ހަރަދުގައި 10 ކުދިންނަށް ބޯންމެރޯ ހެދުމުގެ ފުރުސަތު ދިނުމަށް ވަނީ ނިންމާފަ އެވެ.
ރާއްޖޭގައި މިހާރު ތެލެސީމިއާ ބަލީގެ 659 ކުދިން ފަރުވާ ހޯދަމުން ދާއިރު، އޭގެ ތެރެއިން 300 ކުދިންނަކީ މާލޭގައި ދިރިއުޅެމުން ފަރުވާ ހޯދަމުންދާ ކުދިންނެވެ. ސަރުކާރުން މިހާރު ވަނީ ތެލެސީމިއާ ފަރުވާއަށް ބޭނުންވާ ބޭހާއި އެހެނިހެން އާލާތްތައް އެސްޓީއޯ މެދުވެރިކޮށް އާސަންދައިގެ ތެރެއިން ލިބޭނެ އިންތިޒާމު ހަމަޖައްސާފަ އެވެ.
ރައީސް ޑރ. މުހައްމަދު މުއިއްޒުގެ ރިޔާސީ ވައުދެއްގެ ގޮތުގައި ހިމެނޭ ބޯންމެރޯ ޓްރާންސްޕްލާންޓް ހިލޭ ހެދުމުގެ އިތުރުން، ރާއްޖޭގައި ތެލެސީމިއާއަށް ހާއްސަ ހޮސްޕިޓަލެއް ގާއިމުކުރުމަށް ވެސް މި ސަރުކާރުން ވަނީ ނިންމާފަ އެވެ.
