ބާސެލޯނާއިން ރޭ، ރިއާލް އަތުން މޮޅުވީ ހަތަރު ލަނޑު ސުން ލަނޑުންނެވެ. ރޭގެ މެޗުގައި ބާސާގެ ލެވަންޑޯސްކީ ފުރަތަމަ ގޯލު ޖެހީ 54 ވަނަ މިނިޓްގަ އެވެ، އޭގެ ދެ މިނިޓް ފަހުން، އޭނާ ދެ ވަނަ ގޯލު ޖެހި އެވެ. ބާސެލޯނާ އިން 77 ވަނަ މިނިޓްގައި ތިން ވަނަ ގޯލު ޖެހި އެވެ.
މި ލަނޑު ޖެހީ 17 އަހަރުގެ ލަމީން ޔަމާލް އެވެ. މި ގޯލާ އެކު، ޔަމާލް ވެފައިވަނީ، އެލް ކްލަސިކޯގެ ތާރީހުގައި ވެސް ގޯލު ޖެހި އެންމެ އުމުރުން ހަގު ކުޅުންތެރިޔާ އަށެވެ. އޭނާ ގޯލު ޖެހިއިރު، އުމުރަކީ 17 އަހަރާއި 106 ދުވަހެވެ. މެޗުގެ 84 ވަނަ މިނިޓްގައި ރަފީނިއާ ވަނީ ބާސެލޯނާގެ ހަތަރު ވަނަ ގޯލު ޖަހައިފަ އެވެ.
މި މޮޅާ އެކު، ބާސެލޯނާ ވަނީ ލީގުގެ އެއް ވަނައިގައި ހަ ޕޮއިންޓުގެ ލީޑެއް ނަގައިފަ އެވެ.
މި ނަތީޖާއާ އެކު، ލީގުގައި ބަލިނުވެ ބާސެލޯނާ އިން ހަދާފައި އޮތް ރެކޯޑާ ހަމަކުރަން ރެއާލުން ކުރި މަސައްކަތް ފެނަށް ދިޔައީ އެވެ. ބާސެލޯނާ އިން ބަލިނުވެ، 43 މެޗު ހަމަކުރިއިރު، މިރޭގެ މެޗަކީ، ރެއާލުން ބަލިނުވެ، ކުރިމަތިލި 43 ވަނަ މެޗެވެ.
