މިނިސްޓަރު ޝިޔާމް ވިދާޅުވީ ރާއްޖެއަކީ ވަށައިގެން ކަނޑު އޮންނަ ޖަޒީރާ ގައުމަކަށް ވުމުން، މޫސުމީ ބަދަލުތަކުގެ ސަބަބުން ކަނޑުގެ ދިރުންތަކަށް ކުރާ އަސަރު ރާއްޖެއަށް ވަރަށް ބޮޑަށް ކުރަމުންދާ ކަމަށެވެ. އަދި މަސްވެރިކަމުގައި ގެންގުޅޭ ނުރަނގަޅު އާދަތަކުގެ ސަބަބުން އެ ސިނާއަތަށް ބަރޯސާވާ ގިނަ ބަޔަކަށް ގެއްލުން ވަމުންދާ ކަމަށް ވެސް ފާހަގަކުރެއްވި އެވެ.
ދުނިޔޭގެ ބާޒާރުގައި މަހުގެ އުފެއްދުންތަކަށް އޮންނަ ޑިމާންޑް އިތުރުވަމުންދާއިރު، ދެމެހެއްޓެނިވި ގޮތެއްގައި މަސްވެރިކަން ކުރިއަށް ގެންދިއުމަށް އާ އީޖާދުތަކާއި ވަސީލަތްތައް ބޭނުންވާ ކަމަށް މިނިސްޓަރު ވިދާޅުވި އެވެ.
ކަނޑުގެ ވަސީލަތްތަކުގެ ސަލާމަތްތެރިކަން ކަށަވަރު ކުރުމަށް ގައުމުތައް ގުޅިގެން މަސައްކަތް ކުރުމުގެ މުހިންމުކަން ފާހަގަކުރައްވަމުން، މި ފޯރަމަކީ އެކަމަށް ލިބުނު މުހިންމު ފުރުސަތެއް ކަމަށް މިނިސްޓަރު ވިދާޅުވި އެވެ. މި ފޯރަމް ކުރިއަށް ގެންދިޔައީ މި މަހުގެ 24 އާއި 25 އާ ދެމެދު އެވެ.
