މިއާ އެކު މި އަހަރު ތެލުގެ ސަބްސިޑީ އަށް ޖުމުލަ 1.3 ބިލިއަން ރުފިޔާ ހޭދަވާނެއެވެ.
ފިނޭންސް މިނިސްޓަރު މޫސާ ޒަމީރު މަޖިލީހަށް ހުށަހެޅި 5.1 ބިލިއަން ރުފިޔާގެ ސަޕްލިމެންޓްރީ ބަޖެޓުގައި، ތެލުގެ ސަބްސިޑީ އަށް އިތުރުކުރި 590 މިލިއަން ރުފިޔާ ހިމެނެ އެވެ. މި އަހަރުގެ ބަޖެޓުގައި ތެލުގެ ސަބްސިޑީ އަށް ފުރަތަމަ ކަނޑައެޅި 775 މިލިއަން ރުފިޔާ އަށް މި އަދަދު އިތުރުވުމުން، ޖުމުލަ ހޭދަ 1.3 ބިލިއަން ރުފިޔާ އަށް އަރާނެ އެވެ.
ކައުންސިލުތަކަށް ދޭ އެހީ އާއި އާސަންދަ އަށް ފަހު، ދައުލަތުން އެންމެ ބޮޑު ސަބްސިޑީއެއް ދެނީ ތެލަށެވެ. މިދިޔަ އަހަރު ތެލުގެ ސަބްސިޑީ އަށް 1.9 ބިލިއަން ރުފިޔާ ހޭދަކުރި އެވެ.
ސަބްސިޑީގެ ހަރަދުތައް ކުޑަ ނުކުރެވުނު އެއް ސަބަބަކީ މި އަހަރު ގެންނަން ކަނޑައެޅި ރިފޯމުތަކުގެ މަސައްކަތް ނުކުރެވުން ކަމަށް ފިނޭންސް މިނިސްޓްރީން ބުނެފައިވެ އެވެ. މި އަހަރު ސަބްސިޑީ އަށް ކުރާ ޖުމުލަ ހޭދަ 11 ބިލިއަން ރުފިޔާ އަށް އަރާނެ ކަމަށް ވެސް އެ މިނިސްޓްރީން ބުނެފައިވެ އެވެ.
