ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބޭނުންކުރާނެ ކަނޑައެޅި ސްލޯގަންއަކީ "ތަރައްގީގެ ބައިވެރިޔާ" މި ސްލޯގަންއެވެ. މީ މިއަހަރު 75 އަހަރު ފުރޭ ސްޓެލްކޯގެ ތާރީހުގައި އެކުންފުނިން ސްލޯގަންއެއް ކަނޑައެޅި ފުރަތަމަ ފަހަރެވެ.
ސްޓެލްކޯއިން އަލަށް ކަނޑައެޅު ސްލޯގަން އިފްތިތާހުކޮށްދެއްވީ އެ ކުންފުނީގެ މެނޭޖިންގް ޑިރެކްޓަރ ހުސައިން ފަހުމީއެވެ.
(ސްޓެލްކޯ) އިން ބޭނުންކުރާނެ ކަނޑައެޅި ސްލޯގަންއަކީ "ތަރައްޤީގެ ބައިވެރިޔާ"
މި ސްލޯގަންއިން ރަމްޒުކޮށްދެނީ 1949 ވަނަ އަހަރު ރާއްޖޭގައި ކަރަންޓުގެ ހިދުމަތް ފެށިގެން މި ވޭތުވެދިޔަ މުއްދަތުގައި ޤައުމީ ތަރައްގީގައި ސްޓެލްކޯއިން ވެފައިވާ ހިއްސާކަމަށް އެ ކުންފުނިން ބުނެ އެވެ. އެގޮތުން ޤައުމީ ތަރައްގީގެ ދުވެލި ހަލުވިވެގެން ދިއުމުގައި ކަރަންޓުގެ ސިނާއަތާއި އެ ސިނާއަތުގައި ހިދުމަތްދޭން އޮތް ކުންފުނީގެ ހައިސިއްޔަތުން ސްޓެލްކޯގެ ދައުރު މި ސްލޯގަންއިން ރަމްޒުކޮށްދޭކަމަށް އެ ކުންފުނިން ބުނެއެވެ.
މީގެއިތުރުން 1949ން ފެށިގެން ސްޓެލްކޯއިން (އެކި ނަންނަމުގައި) ދެމުން އައި ކަރަންޓުގެ ހިދުމަތުގެ އިތުރުން މިހާރު މި ކުންފުނިން ދެމުންދާ ފެނާއި، ނަރުދަމާގެ ހިދުމަތާއިއެކު ގައުމީ ތަރައްގީގައި ކުންފުނީގެ ހިއްސާ އިތުރުވެގެން ގޮސްފައިވާވުން ވެސް މި ސްލޯގަންއިން ރަމްޒުކޮށްދޭނެކަމަށް ސްޓެލްކޯއިން ބުނެއެވެ.
